Ilıa Ilın Londonda jankúıerlerimen júzdesti
ASTANA. QazAqparat - Aýyr atletıkadan tórt dúrkin álem chempıony, eki dúrkin Olımpıada chempıony Ilıa Ilın Londondaǵy jankúıerlerimen kezdesti.
Qazir ol Anglııada aǵylshyn tilin meńgerip júr. Kezdesý barysynda Qazaqstannyń atyn álemge pash etken sportshy jetken jetistikteriniń qyr-syrymen jáne aldaǵy josparlarymen bólisti. Tórt dúrkin álem chempıony Ilıa Ilın eńbekqorlyǵy, qarapaıymdylyǵy ári ázilqoılyǵymen Londondaǵy UCL ýnıversıtetiniń stýdentterin tamsandyrdy. Jastardyń qyzyǵýshylyǵyn arttyratyn mundaı qyzyq kezdesýdiń bilim oshaǵynda uıymdastyrylmaǵanyna biraz bolǵan eken.
«Men Anglııada bilim alyp jatqan qazaqstandyq stýdenttermen kezdesýge múmkindik týǵanyna qýanyshtymyn. Otandastarymnyń saýaldaryna jaýap berýmen qatar, olardyń ómir tynysymen tanystym. Bizdiń bir-birimizden úırenerimiz kóp dep oılaımyn»,- deıdi eki dúrkin Olımpıada chempıony Ilıa Ilın.
Warwick ýnıversıtetiniń stýdenti Bolat Nasyǵasynyń aıtýynsha, Ilıamen kezdesý tek orys tilinde ótken. Soǵan qaramastan, oǵan brıtandyqtar da qatysty. Stýdenttik aýyr atletıka klýbynyń músheleri álem chempıonymen tikeleı júzdesip, qoltańba alǵandaryna rıza.
«Ilıa Ilın biz úshin aty ańyzǵa aınalǵan sportshy. Álem chempıonynyń qolyn alyp, kókeıimizdegi saýaldarymyzdy qoıýǵa múmkindik alǵanymyzǵa qýanyshtymyz. Ol bizge sheberlik synybyn ótkizýge ýáde berdi. Bul biz úshin úlken mártebe»,- deıdi qýanyshyn jasyra almaǵan Aýyr atletıka klýbynyń múshesi Benedıkt Ýılıams.
Kezdesý barysynda Ilıa Ilın úlken sportpen úsh jyldan soń qoshtasatyndyǵyn jetkizdi. Sondaı-aq aldaǵy ýaqytta jattyqtyrýshy bolatyndyǵyn jáne qaıyrymdylyq jobalarymen aınalasatyndyǵyn atap ótti. Ilıa Tumandy Albıonda bilimin jetildirgen jalǵyz qazaqstandyq sportshy emes. Oǵan deıin Olımpıada chempıony Serik Sapıev aǵylshyn tili kýrsyn oqyǵan edi. Al birer kúnde tap osy maqsatpen bylǵary qolǵap sheberi Bahtııar Artaev Anglııaǵa barmaq. Mundaǵy qazaqstandyq stýdentter Bahtııardyń qurmetine fýtboldan jarys uıymdastyrýdy oılastyrýda, dep habarlaıdy 24.kz.
