Ilıa Ilın: Kezek maǵan da keledi
ASTANA. QazAqparat - Olımpıada chempıony Ilıa Ilın qazaqstandyq aýyr atletshi qyzdardyń sporttan shettetilýine qatysty óz pikirimen bólisti, dep habarlaıdy QazAqparat.
«Bizdiń qyzdardy, árıne aıaımyn! Kelesi kezekte men turmyn», - dedi ol óziniń Tvıtter-akkaýntynda.
Eske sala keteıik, Halyqaralyq aýyr atletıka federatsııasy (HAAF) dopıng synamalarynda tyıym salynǵan preparattar tabylǵan qazaqstandyq úsh aýyr atletke qatysty sanktsııa qoldaný týraly resmı sheshim shyǵarǵan bolatyn.
Federatsııadan habarlaǵandaı, HAAF tártiptik komıssııasynyń sheshimine sáıkes, Maııa Maneza men Zýlfııa Chınshanlo sporttan eki jylǵa, al Svetlana Podobedova 8 jylǵa shettetildi. Sheshim Londondaǵy Olımpıadanyń dopıng synamasyn taldaý nátıjesinen tyıym salynǵan zattar tabylǵan sátten, ıaǵnı 2016 jylǵy 26 mamyrdan bastap kúshine enedi.
