Ilıa Ilın qazaqstandyq aýyr atlet Vladımır Sedovtyń óz-ózine qol jumsaýyna qatysty pikir bildirdi
Ilın Instagram jelisinde Vladımır Sedovtyń otbasyna kóńil aıtty.
«Ózimniń jáne otbasymnyń atynan Volodıanyń otbasyna, týystary men jaqyndarynyń qaıǵylaryna ortaqtasyp kóńil aıtamyn. 2014 jyly Volodıa meniń komandamda álem chempıonatynda óner kórsetip, kúmis medal jeńip aldy. Sol jeńisiniń arqasynda Qazaqstan Respýblıkasynyń eńbek sińirgen jattyqtyrýshysy ataǵyn aldym. Bul úshin men oǵan árqashan alǵysymdy bildiremin. Ókinishke oraı, sońǵy jyldary jolymyz ekige bólinip ketti, biraq men ony sportshy retinde de, myqty tulǵa retinde de qurmet tutamyn.
Volodıa joǵary deńgeıdegi kásipqoı sportshy, aqyldy, talantty edi, bapker retinde kóptegen ziltemirshiler men chempıondardy tárbıeleýi múmkin edi, biraq taǵdyry basqasha boldy. Orny tolmas qaza oryn aldy», — dep jazdy Ilıa Ilın.
Buǵan deıin Aýyr atletıka federatsııasy aýyr atlet Vladımır Sedovtyń qaıtys bolǵanyn habarlaǵan bolatyn. Aqparatty QR Mádenıet jáne sport mınıstrligi de rastady.
