Ilıa Ilın halyqaralyq týrnırge qatysatyn qazaqstandyq sportshylar tizimine endi
ASTANA. QazAqparat - 19 jeltoqsanda Katar astanasy - Doha qalasynda halyqaralyq Katar kýbogy týrnıri bastalady. Atalmysh týrnırge Qazaqstan quramasy sapynda 9 sportshy qatysady, dep habarlaıdy QazAqparat tilshisi.
Aıta keterligi, atalmysh týrnırde 2020 jylǵy Tokıo Olımpıadasyna joldama beriledi. Sondyqtan jarys barysynda oǵan qatysýshylar Olımpıadada júldeler sarapqa salynatyn salmaq dárejelerinde synǵa túsedi.
Ulttyq qurama sapynda 109 keli salmaqta belgili aýyr atlet Ilıa Ilınniń baq synaıtyny belgili boldy.
Esterińizge sala ketelik, ol bastapqyda 1-10 qarashada Túrikmenstan astanasy - Ashhabad qalasynda ótken álem birinshiligine baratyn sportshylar tiziminde bolǵan edi.
Keıinnen ol alǵan jaraqatyna baılanysty oǵan qatysa almaıtynyn málimdedi.
Katar kýbogy týrnırinde Ilıa Ilınnen ózge Arlı Chonteı (55 keli), Igor Son (61 keli), Farhad Harkı (67 keli), Nıjat Rahımov (73 keli), Aıdar Qazov (81 keli, Rústem Sybaı (96 keli), Karına Gorıcheva (64 keli) jáne Raýshan Meshithanova (87 keli) bar.
Atalmysh týrnır 23-jeltoqsanǵa deıin jalǵasady.
