Ilıa Ilın: Eshkim menen syrt aınalyp ketken joq
ASTANA. QazAqparat - Qazaqstandyq aýyr atlet, álemniń tórt dúrkin chempıony Ilıa Ilın dopıng daýynan keıin eshkim ózinen teris aınalyp ketpegenin jetkizdi, dep habarlaıdy QazAparat tilshisi.
«Eshkim menen syrt aınalyp ketken joq. Bári de oıdaǵydaı boldy. Keıde ómirde bir adammen kele jatyp, joldaryń ekige aıyrylatyn kez bolady. Onyń ómiri basqa, seniki basqa - ary qaraı júre beresiń. Menen eshkim teris aınalyp ketken joq. Baqytty adammyn. Bul turǵyda mende bári jaqsy. Otbasymdy, áke-sheshemdi erekshe atap ótkim keledi. Áke-sheshemniń sarqylmas sabyryna alǵysym zor. Olar óte kúrdeli kezeńderdi menimen birge júrip ótti», - deıdi Ilı Ilın.
Ilın sondaı-aq burynǵy bapkeri - Erjas Boltaevpen qarym-qatynasy týraly aıtty.
«Erjas jaıly aıtarym - burynǵydaı qarym-qatynasymyz jaqsy. Ol Qazaqstan quramasyna jumys isteýge ketti. Qazir jigitterdi baptap jatyr. Keremet jattyqtyrýshy. Men árdaıym ol jaıly aıtyp kelemin, Qazaqstan quramasyn alǵa jetelep júre alatyn adam. Ol jaqta Sergeı Sedov, Arman Ábdireev te bar. Quramanyń osy tirekteri atletterdi shynaıy daıyndaı alady. Olar ony dáleldep keledi», - dedi aýyr atlet.
«Sońǵy márte serpilis jasaý kerek!» degen aýyr atlet sporttyq mansabyn Tokıoda aıaqtaý týraly ıdeıa burynnan baryn jetkizdi.
«Men kezinde, sonaý Beıjińde (2008 jylǵy Jazǵy Olımpıadada - avt.) alǵa qoıǵan mıssııa jolymen kelemin. Beıjiń men London Olımpıadalary men úshin óte keremet ótti. Álemniń tórt dúrkin Olımpıada chempıony bolǵym keldi. Álbette, ońaıǵa túspedi. Ómirde mıssııany oryndaý úshin shyrmaýdan ótýge týra keledi eken», - dedi Ilıa Ilın.
