Ilıa Ilın aýrýhanaǵa túsip qaldy
NUR-SULTAN. QazAqparat - Qazaqstandyq aýyr atlet, álemniń tórt dúrkin chempıony Ilıa Ilın aýrýhanaǵa túsip qaldy, dep habarlaıdy QazAqparat.
Sportshy óziniń Instagram paraqshasynda dárigerlerge arnap vıdeoúndeý joldady.
«Men bul vıdeony júktegim kelmedi, biraq qazirgi qal jaǵdaıymdy jazǵanym durys dep sheshtim. Qazir bári oıdaǵydaı. Vıdeoda bárin qysqasha aıttym. Dárigerlerimizge kóp raqmet! Qazir sizder úshin óte qıyn kezeń ekenin bárimiz jaqsy túsinemiz. Sizderge búkil Qazaqstan halqy úmitpen qarap otyr» dep jazady Ilıa Ilın.
Óziniń aıtýynsha, aýyr atlet alty kúnnen beri aýrýhanada jatyr. Ol koronavırýs juqtyrmaǵan, kúızeliske baılanysty allergııalyq reaktsııa bolǵan. Qyzylordalyq dárigerler áreń degende esin jıǵyzǵan.
Qazir ol ekinshi kún qatarynan jattyǵý jasap, aýrýdy jeńýge bar kúshin salyp jatyr.
«Dostar, ózińizge jáne jaqyndaryńyzǵa qamqor bolyńyz» degen sportshy óziniń jatqan palatasy men qalaı jattyǵý jasap júrgenin kórsetedi.
Eske sala keteıik, Ilıa Ilın taıaýda ǵana Qyzylordadaǵy «Muz saraıynyń» dırektory bolyp taǵaıyndalǵan edi.
