Ilıa Ilın «2014 jyldyń úzdik aýyr atleti» atandy (FOTO)
ASTANA. QazAqparat - Halyqaralyq aýyr atletıka federatsııasy 2014 jyldyń úzdik atletterin atady. Búgin Astanada «Jyldyń úzdik aýyr atleti» ataǵynyń laýreattaryn marapattaý rásimi bolyp ótti.
Bul bedeldi ataqqa qazaqstandyq aýyr atlet, eki dúrkin Olımpıada chempıony Ilıa Ilın men reseılik sportshy qyz, Olımpıada oıyndarynyń kúmis júldegeri Tatıana Kashırına ıe boldy. Olar halyqaralyq aýyr atletıka federatsııasynyń resmı jýrnaly «World weightlifting» (Aýyr atletıka álemi) jankúıerler arasynda uıymdastyrǵan ınternet-daýys berý qorytyndysy boıynsha ozyp shyqqan. Ǵalamtor jelisinde daýys berý sharasyna dúnıe júzinen 2 myńnan astam adam qatysyp, jeńimpazdardy anyqtady. «Meniń jeńisterim - tek meniń ǵana emes, barlyq ujymnyń jetistikteri. Bul tek basy ǵana, sondyqtan áli de alǵa qaraı jyljyp, jańa asýlar men altyn medaldardy baǵyndyra beremiz. Maǵan úlken otbasy degen uǵym óte qatty unaıdy. Men sol otbasynda bolyp, aýyr atletıkany damytyp, elimizdegi aýyr atletıka tarıhynyń bir bóligine aınalǵym keledi», - dedi I.Ilın áriptesteriniń quttyqtaýyn qabyl ala otyryp. Saltanatty sharaǵa QR Premer-Mınıstriniń orynbasary Berdibek Saparbaev qatysyp, sportshylardy jeńisterimen quttyqtady. «Men Ilıany kishkentaı kezinen bilemin. Ol óziniń mańdaı teri arqyly eńbektiń ne ekenin, dene shynyqtyrýmen shuǵyldanýdyń mańyzdylyǵyn dáleldedi. Qarapaıym otbasynan shyqsa da, ol óziniń alǵa qoıǵan maqsatyna eńbek pen talap arqyly jetýge bolatynyn barsha álemge kórsetti», - dedi B.Saparbaev. Aıta keteıik, Astanada ótken saltanatty sharaǵa Halyqaralyq aýyr atletıka federatsııasynyń (IWF) prezıdenti Tomash Aıan men IWF birinshi vıtse-prezıdenti Nıký Vlad arnaıy keldi. «Ilıa Ilın naǵyz erlik jasady. Men onyń Olımpıadada jasaǵan rekordyn áli kúnge deıin umyta almaı júrmin. Men oǵan budan bylaı da tek jeńister tileımin», - dedi Tomash Aıan. Aıta keteıik, daýys berý qorytyndysy boıynsha erler arasynda ekinshi orynǵa qytaı sportshysy, Olımpıada chempıony jáne álem chempıony Lıao Hýeı, al áıelder arasynda qazaqstandyq sportshy qyz, álemniń úsh dúrkin chempıony Zýlfııa Chınshanlo turaqtady. Erler arasyndaǵy úshinshi oryn tartysty ótkenimen, aqyr aıaǵynda reseılik sportshy Rýslan Albegovke buıyrdy. Al áıelder arasynda qytaılyq sportshy qyz Deng Veı úshinshi oryndy mise tutty.
