Ilham Álıev: Astanaǵa kelgen saıyn sáýlettiń tyń sheshimderi tańdaı qaqtyrady
«Astanaǵa kelgen saıyn damýdyń qarqyndylyǵyn baıqaımyn. Bir qarasańyz, qala turǵyndaryna jaıly jaǵdaıdyń, sáýlettik damý turǵysynan bári jasalǵan sekildi dep oılap qarap otyrsań da, kelgen saıyn Astana jańa jobalarymen, jańa sáýlettik shemimimen, damýdyń jańa baǵyttarymen tańdaı qaqtyrady. Sondyqtan, Astana - zamanaýı ári tabysty qala qurylysynyń jarqyn úlgisi bolyp tabylady. Bul jerde sáýlettik sheshimder ınfraqurylymdyq sheshimdermen ushtasyp jatyr. Sol sebepti, qala turǵyndar úshin óte yńǵaıly. Astanaǵa kelgenderdiń bárine óte jaıly shahar. Qalanyń damýyna Qazaqstan basshylyǵy zor mahabbatpen qaraıtyny kórinip tur», - deıdi Ilham Álıev «Habar» arnasyndaǵy Erlan Bekhojınniń «Uly dalanyń astanasy» atty derekti fılminde.
Ázerbaıjan Prezıdentiniń aıtýynsha, 20 jyl buryn Qazaqstannyń ekonomıkalyq áleýeti qazirgideı bolmaǵan. Ol shaq - iri ekonomıkalyq reformalardyń kezeńi bolǵan. Sondyqtan, Astananyń kóshirý týraly bastama úlken erlikti jáne aqyldy talap etken.
«Qala bos jatqan aýmaqta turǵyzyldy. Men Astananyń irgesiniń qalaný kezeńin bilemin. Álbette, bul orasan zor kúsh-jigerdi jáne adamı, qarjylyq resýrstardy talap etken. Astanany kóshirý týraly sheshimdi kóptegen adamdar kútpegen de edi. Biraq, ómirdiń ózi kórsetip otyrǵandaı, bul óte sátti sheshim boldy. Óıtkeni, zamanǵa saı alshań basyp kele jatqan alyp shahar turǵyzyldy», - deıdi ol.
Ilham Álıevtiń sózine sáıkes, Astananyń damýy júz myńdaǵan jumys oryndaryn ashýǵa múmkindik bergen.
«Qaladaǵy qurylys qarqyny qurylys materıaldarynyń ındýstrııasynyń jáne ınjenerııanyń damýyn qamtamasyz etti. Demek, elorda óziniń sońynan damýdyń dańǵylyn alyp kele jatqan edi. Sondyqtan, sheshim áste qarapaıym emes ári durys boldy. Úlken shyǵyndarǵa qaramastan, ekonomıkalyq turǵydan ózin tolyǵymen aqtady dep aıta alamyn. Damýdyń jańa qyrlaryn kórseń, árdaıym ózińe de sińirgiń kelip turady. Astananyń tájirıbesin, eń aldymen josparlaýdyń durys ádisin zertteı otyryp, Astananyń sáýleti óte úlken qyzyǵýshylyqty týdyryp otyrǵanyn baıqaýǵa bolady. Óner týyndysyndaı - qala úlken mahabbatpen jáne tilekpen turǵyzylǵan. Áý basta menińshe, Astana turǵyzylar kezde táýelsiz Qazaqstannyń jańa sımvolyn qalyptastyrý kózdelgen sekildi. Mine, bul maqsatqa qol jetkizildi», - deıdi Ilham Álıev.
Aıta ketsek, Erlan Bekhojınniń «Uly dalanyń astanasy» atty derekti fılminde postkeńestik elderdiń basshylary Qazaqstan Prezıdenti Nursultan Nazarbaev pen Astana qalasy týraly ózderiniń oı-paıymdarymen bólisken.
