IKU-nyń Bas hatshylyǵy dinaralyq jáne mádenıetaralyq dıalogty kótermeleý úshin qosymsha sharalar ótkizýge ótinish jasady
A. Qańtardyń 18-i. QazAqparat /Ernur Aqanbaı/ - Qazaqstannyń Saýd Arabstandaǵy Elshiliginiń aqparatyna sáıkes, Islam konferentsııasy uıymynyń Bas hatshylyǵy osy qurylymǵa múshe elderge 2010 jyl boıy álem ıgiligi úshin ózara túsinistik pen yntymaqtastyqty, dinaralyq jáne mádenıetaralyq dıalogty kótermeleý jónindegi qosymsha sharalar ótkizý týraly ótinish jasady.
Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov málim etti, dep habarlaıdy QazAqparat.
Brıfıngte 2010 jyldy QR Prezıdenti Nursultan Nazarbaevtyń bastamasy boıynsha BUU Halyqaralyq mádenıetterdiń jaqyndasýy jyly dep jarııalaǵanyn aıtqan A. Ábdirahmanov: «IKU-nyń Bas hatshylyǵy órkenıetaralyq jáne dinaralyq dıalogty ilgeriletýdegi Qazaqstannyń biregeı qyzmetin moıyndaıdy jáne osyǵan baılanysty Uıymǵa múshe-memleketterge olardyń 2010 jyly atalmysh salada josparlanǵan sharalary, sondaı-aq yqtımal kózqarastary men usynystary týraly Qazaqstan jaǵyn habardar etýin ótinýde», dedi resmı ókil.
«Islam konferentsııasy Syrtqy ister mınıstrler Keńesiniń kelesi tóraǵasy retinde Qazaqstannyń saılanýy, bedeldi uıym tarapynan bizdiń memleketke degen joǵary dárejeli senimdi dáleldeıdi. Qazaqstan atalmysh tóraǵalyqqa joǵary mán beredi jáne ony EQYU-ǵa tóraǵa qyzmeti sheńberinde atqarylyp keletin áreketterdiń asa paıdaly jalǵasýy retinde qarastyrady», dedi A. Ábdirahmanov.
