IKAO talabyna sáıkes Azamattyq avıatsııa komıteti bilikti mamandardy tartýdy jalǵastyrady
ASTANA. 16 shilde. QazAqparat - Halyqaralyq azamattyq avıatsııa uıymynyń (IKAO) eskertýlerin joıý maqsatynda QR Kólik jáne kommýnıkatsııa mınıstrliginiń Azamattyq avıatsııa komıtetiniń shtattyq sany 65 qyzmetkerge deıin artty.
Olardyń 40-y ushý qaýipsizdigi boıynsha memlekettik ınspektorlar.
Bul týraly mınıstrliktiń baspasóz qyzmetinen habarlandy.
Avıatsııa ákimshiliginiń shtattyq sanynyń azdyǵy jáne mamandar biliktiliginiń tómen bolýy Qazaqstannyń Eýroodaqtyń «qara tizimine» enýine birden-bir sebep bolǵan edi. Salaǵa bilikti mamandardy tartý maqsatynda Memleket basshysynyń Jarlyǵymen eńbekaqysynyń kólemi sala mekemelerindegi ortasha jalaqy kólemine deıin kóbeıtildi. Buǵan qosa jumysqa qabyldanatyn qyzmetkerlerge qoıylar talap ta kúsheıtildi. Aǵymdaǵy jyldyń 1 shildesinde memlekettik qyzmetkerlerdi jumysqa qabyldaý konkýrsy ótkizilip, nátıjesinde 7 maman qyzmetke qabyldandy.
Jumysqa qabyldanǵan barlyq qyzmetkerlerdiń atalǵan salada 15-20 jyldyq jáne olar ushaqpen 14 myń saǵattyq ushý tájirıbesi bar ushqyshtar bolyp sanalady. Sondaı-aq, bulardyń qatarynda aeronavıgatsııa dıspetcherleri, ushýlarǵa meteorologııalyq qyzmet kórsetý ınjenerleri, ushý jaramdylyǵyna daıyndaý boıynsha Eýropalyq avıatsııa standarttary boıynsha oqý kýrstarynan ótip, tıisti sertıfıkatqa ıe bolǵan, aǵylshyn tilin erkin meńgergen tájirıbeli mamandar bar.
«Azamattyq avıatsııa komıteti jaqyn ýaqytta memlekettik ınspektor qyzmetkeriniń bos turǵan 11 vakansııasyna kezekti konkýrsty jarııalamaq. Nátıjesinde aǵymdaǵy jylǵy tamyz aıynyń sońyna deıin Komıtettiń azamattyq avıatsııa salasynda baqylaý-qadaǵalaý qyzmetin atqaratyn barlyq basqarmalary avıatsııalyq bilimi jáne atalǵan salada aıtarlyqtaı eńbek tájirıbesi bar mamandarmen tolyǵymen jasaqtalmaq», - delingen baspasóz baıanynda.
