IKAO Qazaqstannyń Aqtaý mańyndaǵy ushaq apatyn tergeý boıynsha esebin joǵary baǵalady
ASTANA. KAZINFORM – Vıtse-premer Qanat Bozymbaev IKAO Eýropalyq jáne soltústikatlantıkalyq bıýrosynyń dırektory Nıkolıa Rallomen kezdesti.

Qanat Bozymbaev IKAO-ǵa Qazaqstanmen yntymaqtastyq máselesinde turaqty qoldaý bildirip kele jatqanyna rızashylyq tanytyp, Azerbaijan Airlines áýe kemesi apatqa ushyraǵan jerge táýelsiz sarapshy Tormodýra Tormodssondy der ýaqytynda jibergeni úshin alǵys aıtty.
- Úkimet atynan bizge kórsetken turaqty qoldaýyńyz, onyń ishinde bastamalarymyzǵa qoldaýyńyz úshin sizge shynaıy rızashylyǵymdy bildiremin. Atalǵan tergeýdi tolyqtaı aıaqtaý úshin IKAO-men ózara is-qımyldy jalǵastyramyz, - dedi Úkimet basshysynyń orynbasary.
Vıtse-premer áýe kemesi apatqa ushyraǵan birinshi kúnnen bastap Qazaqstan atalǵan oqıǵany shynaıy jáne egjeı-tegjeıli tergeýdi maqsat tutqanyn basa aıtty.
Nıkolıa Rallo óz kezeginde Qazaqstannyń qysqa ǵana ýaqyttyń ishinde «Azerbaijan Airlines» áýe kompanııasy ushaǵynyń apatyn tergeý boıynsha júrgizgen jáne jarııalaǵan aldyn ala esebin joǵary baǵalady.
- Qazaqstan men tergeý jónindegi barlyq komıssııany olardyń kúsh-jigeri úshin atap ótkim keledi. Óıtkeni, olar apattan keıin 1,5 aıǵa tolmaıtyn ýaqyttyń ishinde atalǵan aldyn ala esepti aıaqtaýǵa múmkindik berdi. Men sizdi tergeýdyń barlyq protsesi barysynda Halyqaralyq azamattyq avıatsııa týraly konventsııany tolyqtaı saqtaýdy qamtamasyz etýdi jalǵastyrýǵa shaqyramyn, - dedi Nıkolıa Rallo.

Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyrady.
Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.
Taıaýda Aqtaý mańyndaǵy ushaq apaty boıynsha tergeýdiń esebi jarııalandy.
Kúni keshe Aqtaýdaǵy ushaq apatynan keıin Kólik oqıǵalaryn tergeý jónindegi arnaıy ortalyq qurylatyny belgili boldy.
Sonymen qosa ushaq apatynyń sebebi jyl sońyna deıin anyqtalatyny aıtyldy.