IKAO: Qazaqstanda ushý qaýipsizdiginiń deńgeıi 82 protsentke jetti
QR Premer-Mınıstriniń birinshi orynbasary Roman Sklıar IKAO Eýropalyq jáne Soltústik Atlantıkalyq bıýrosynyń óńirlik dırektory Nıkolas Rallo myrzamen kezdesti, dep habarlaıdy Kazinform.
2023 jylǵy 16-20 qazan aralyǵynda QR KM Azamattyq avıatsııa komıtetiniń shaqyrýymen Halyqaralyq azamattyq avıatsııa uıymynyń (IKAO) Eýropalyq jáne Soltústik Atlantıkalyq bıýrosynyń óńirlik dırektory Nıkolas Rallo myrza Qazaqstan Respýblıkasyna resmı saparymen keldi.
Sapar aıasynda N.Rallo Qazaqstan Respýblıkasy Premer-Mınıstriniń birinshi orynbasary Roman Sklıarmen kezdesý ótkizdi. Kezdesý barysynda taraptar Qazaqstan Respýblıkasy men IKAO arasyndaǵy yntymaqtastyqtyń ózekti máselelerin talqylady. Halyqaralyq azamattyq avıatsııa uıymynyń (IKAO) Eýropalyq jáne Soltústik Atlantıkalyq bıýrosynyń óńirlik dırektorynyń elimizdiń ushý qaýipsizdigi men avıatsııalyq qaýipsizdikti qamtamasyz etý jónindegi jumystaǵy ilgerileýin atap ótti.
Osylaısha, IKAO aýdıtiniń nátıjeleri boıynsha Qazaqstannyń ushý qaýipsizdigin qamtamasyz etý deńgeıi 82%-ǵa deıin artyp otyr. Bul álemdik ortasha kórsetkishten 13 paıyzǵa joǵary.
Sonymen qatar Qazaqstannyń azamattyq avıatsııany basqarý júıesin reformalaý salasyndaǵy oń ilgerileý baıqalatynyna nazar aýdaryldy. Kezdesý barysynda Nıkolas Rallo IKAO ushý qaýipsizdigi men avıatsııalyq qaýipsizdikti, jolaýshylar úshin áýe kóliginiń qoljetimdiligin qamtamasyz etý, sondaı-aq áýe tasymaly naryǵyn ilgeriletý boıynsha Qazaqstanda júrgizilip jatqan barlyq reforma men bastamany qoldaıtynyn aıtyp jetkizdi.
Sonymen birge kezdesý sheńberinde Qazaqstan Respýblıkasynda azamattyq avıatsııa salasyn odan ári damytý maqsatynda Ushý qaýipsizdiginiń ulttyq josparyn ázirleý jáne bekitý, avıatsııa salasyna arnalǵan personaldy oqytý, avıatsııalyq oqıǵalardy tergeý júıesin nyǵaıtý mańyzdylyǵy atap ótildi.
Kezdesý sońynda Premer-Mınıstrdiń birinshi orynbasary Roman Sklıar azamattyq avıatsııany damytý jónindegi bastamalar odan ári jalǵasatynyn aıtyp jetkizdi. Kezdesý qorytyndysy boıynsha eki tarap talqylanǵan máseleler boıynsha jemisti yntymaqtastyqty jalǵastyrýǵa kelisti.
