IKAO Bas hatshysy Qazaqstannyń avıatsııa salasyndaǵy úlesin atap ótti
ASTANA. KAZINFORM – Marrakesh qalasynda (Marokko) ótken ICAO Global Implementation Support Symposium 2026 aıasynda Halyqaralyq azamattyq avıatsııa uıymynyń (IKAO) Bas hatshysy Hýan Karlos Salasar men Qazaqstan Respýblıkasy Qurylys jáne Mobıldilik mınıstrligi Azamattyq avıatsııa komıtetiniń tóraǵasy Saltanat Tompıeva kezdesý ótkizdi. Bul týraly Kólik mınıstrligi habarlady.
Kezdesýge sondaı-aq IKAO EUR/NAT bıýrosynyń Óńirlik dırektory Nıkolas Rallo jáne Qazaqstannyń IKAO janyndaǵy Turaqty ókili Tımýr Tilegenov qatysty. Taraptar azamattyq avıatsııany damytý máselelerin, onyń ishinde ushý qaýipsizdigin arttyrý, adamı kapıtaldy damytý, ınfraqurylymdy jańǵyrtý jáne halyqaralyq yntymaqtastyqty keńeıtý baǵyttaryn talqylady.
IKAO Bas hatshysy Qazaqstannyń halyqaralyq avıatsııa uıymynyń bastamalaryn júzege asyrýǵa qosqan úlesin atap ótti. Hýan Karlos Salasar Qazaqstannyń azamattyq avıatsııa salasynda júıeli jumys júrgizip, kóshbasshylyq kórsetip, jahandyq bastamalarǵa belsendi qatysyp otyrǵanyn málimdedi.
Saltanat Tompıeva óz sózinde IKAO-men yntymaqtastyqtyń Qazaqstan úshin strategııalyq mańyzǵa ıe ekenin atap ótti. Ol Qazaqstannyń aýmaǵy úlken, teńizge shyǵa almaıtyn damýshy memleket retinde azamattyq avıatsııany negizgi kólik quraly retinde qarastyratynyn, ushý qaýipsizdigi men avıatsııalyq qaýipsizdikti qamtamasyz etý, IKAO standarttaryna tolyq sáıkes bolý, 2050 jylǵa deıingi azamattyq avıatsııany damytýdyń bas josparyn (CAMP) tıimdi júzege asyrý jáne Qazaqstannyń IKAO Keńesine múshelikke kandıdat retinde usynylýy basty maqsattar ekenin aıtty.
Basqosý barysynda taraptar yntymaqtastyqty odan ári damytý jáne IKAO-nyń jahandyq bastamalaryna qatysýdyń mańyzdylyǵyn atap ótti.
Sońynda Saltanat Tompıeva Hýan Karlos Salasardy Qazaqstanda 2026 jyldyń 20–22 qazanynda ótetin IKAO Avıatsııalyq qaýipsizdik aptasyna (ICAO Security Week 2026) qatysýǵa shaqyrdy.
Kezdesý halyqaralyq azamattyq avıatsııanyń qaýipsiz, turaqty jáne tıimdi damýyn qamtamasyz etý maqsatynda konstrýktıvti dıalog pen yntymaqtastyqty nyǵaıtýǵa baǵyttalǵan ózara múddelilikti kórsetti.
Budan buryn habarlaǵanymyzdaı, Qazaqstan avıatsııalyq qaýipsizdik boıynsha álemdegi TOP-20 eldiń qataryna endi.
