IKAO Bas hatshysy avıatsııa salasyna jastardy tartýdyń mańyzyn atap ótti
ASTANA. KAZINFORM- Astanada ótip jatqan IKAO-nyń 2026 jylǵy Avıatsııalyq qaýipsizdik aptalyǵy (ICAO Security Week 2026) aıasynda avıatsııalyq qaýipsizdik salasyndaǵy kadrlyq áleýetti damytý jáne mamandardyń jańa býynyn daıarlaý máseleleri talqylandy. «Avıatsııa personalynyń kelesi býyny (AVSEC NGAP)» taqyrybyndaǵy paneldik sessııaǵa IKAO Bas hatshysy Hýan Karlos Salasar, Qazaqstannyń Kólik vıtse-mınıstri Talǵat Lastaev jáne avıatsııa salasynyń ókilderi qatysty.
Talqylaýdyń negizgi taqyryptary IKAO-nyń mamandar daıarlaý jónindegi jańa strategııasy, kadr tapshylyǵyn eńserý jáne qazirgi zamanǵy syn-qaterler jaǵdaıynda salanyń turaqty kásibı áleýetin qalyptastyrý boldy.
Pikirtalasqa sondaı-aq IKAO-nyń Áleýetti damytý jáne iske asyrý bıýrosy dırektorynyń orynbasary Mıgel Marın, IKAO-nyń avıatsııalyq qaýipsizdik, kıberqaýipsizdik jáne formaldylyqtardy jeńildetý máseleleri jónindegi dırektorynyń orynbasary Sonıa Hıfdı, sondaı-aq Qazaqstan avıatsııa salasynyń jas mamandary – Astana halyqaralyq áýejaıynyń avıatsııalyq qaýipsizdik qyzmetiniń qyzmetkerleri Valerııa Harlamova men Oljas Qýanysh qatysty.
Qatysýshylar kadr resýrstaryn strategııalyq josparlaý, quzyrettilikke negizdelgen oqytýdy engizý, kásibı ósýge jaǵdaı jasaý jáne avıatsııa salasynyń jastar úshin tartymdylyǵyn arttyrý máselelerin qarastyrdy. Tálimgerliktiń, halyqaralyq tájirıbe almasýdyń jáne jas mamandardyń mansaptyq múmkindikterin keńeıtýdiń mańyzdylyǵyna erekshe nazar aýdaryldy.
Sessııany ashqan IKAO Bas hatshysy Hýan Karlos Salasar álemdik avıatsııanyń bolashaǵyn qalyptastyrýǵa jastardy tartýdyń aıryqsha mańyzyn atap ótti. Onyń aıtýynsha, jas mamandardyń salany damytýǵa qatysty ózindik kózqarasy bar jáne olardyń pikiri halyqaralyq deńgeıde eskerilýi tıis. Ol mundaı kezdesýler urpaqtar arasyndaǵy dıalog úshin mańyzdy alań qalyptastyryp, jas mamandarǵa avıatsııalyq qaýipsizdiktiń strategııalyq máselelerin talqylaýǵa tikeleı qatysýǵa múmkindik beretinin aıtty.
Valerııa Harlamova avıatsııalyq qaýipsizdik salasyndaǵy jumys kásibı quzyretterdi ǵana emes, kúndelikti ómirde de qajetti mańyzdy qarym-qatynas daǵdylaryn qalyptastyratynyn atap ótti.
-Halyqaralyq tájirıbe almasý jas qyzmetkerler úshin erekshe mańyzdy. Ol jańa tásilderdi tabýǵa múmkindik beredi, sonyń nátıjesinde salany odan ári damytýǵa baǵyttalǵan tyń ıdeıalar týyndaıdy, – dedi V. Harlamova.
Osyǵan deıin Qazaqstannyń avıatsııalyq oqıǵalardy tergeý salasynda IKAO tájirıbesin engizetni týraly jazdyq.
