Iisshil ıt sómkesine esirtki salyp alǵan turǵyndy ustady

JAŃAÓZEN. QazAqparat – Mańǵystaý oblysynyń Jańaózen qalasynda ıisshil ıttiń kómegimen esirtkimen júrgen turǵyn ustaldy, dep habarlaıdy QazAqparat tilshisi.

QR Ulttyq ulany «Batys» óńirlik qolbasshylyǵynyń baspasóz qyzmetinen túsken málimetke qaraǵanda, oqıǵa 24 maýsym kúni shamamen saǵat 19.30-da boldy.

«Rahat» jedel aldyn alý sharasy barysynda polıtsııa qyzmetkerlerimen birlese otyryp, 5548-áskerı bóliminiń maman kınology, kishi serjant Asan Abdýkárim «Detektıv» dep atalatyn ıisshil ıtiniń kómegimen turǵynnyń jol sómkesinen 400 gramm marıhýanany tapty.

Qolǵa túsken adam Jańaózen qalasynyń 28 jastaǵy turǵyny bolyp shyqty.

Kórsetken qyraǵylyǵy men kásibı qyzmeti úshin A.Abdýkárim bólim komandırimen yntalandyryldy.

«Detektıvtiń» Ulttyq ulanda júrgenine bes jyldan asty. Osy merzimde ıesimen birge kınologııalyq jarystarǵa qatysyp, júldeli oryndarǵa ıe boldy, sondaı-aq sarbazdarǵa qylmysty ashýǵa járdemdesip keledi.

Atalǵan áskerı bólimde arnaıy úıretilgen 10 ıt bar. Olardy esirtki jáne jarylǵysh zattardy izdestirýge, patrýldik qyzmetke, qylmyskerlerdiń izine túsip, qoǵamdyq tártipti saqtaýǵa paıdalanady.