ІІM: Jol qaýipsizdigi aýdıt ınstıtýtynyń engizilýi jol apattaryn azaıtýǵa septigin tıgizedi
ASTANA. 4 maýsym. QazAqparat - Jol qaýipsizdigi aýdıt ınstıtýtyn engizý adamı faktordan bolatyn jol apattaryn azaıtýǵa septigin tıgizedi. Búgin Májiliste «Jol júrisi týraly» zań jobalaryn talqylaýǵa arnalǵan dóńgelek ústelde QR Іshki ister mınıstriniń orynbasary Amantaı Kúreńbekov osylaı málim etti.
Eske salsaq, Májiliste talqylanyp jatqan zań jobasynyń basty jańalyqtarynyń biri - jol-kólik oqıǵalarynyń oryn alý táýekelin týdyratyn aqaýlardy erte anyqtaý maqsatynda joldar men avtokólikterdiń tehnologııalyq daıyndyǵyn qadaǵalaý. Osyǵan oraı, daıyndyq saraptamasyn ótkizetin jol júrisi qaýipsizdiginiń aýdıti ınstıtýtyn engizý qarastyrylýda. Aýdıt ınstıtýty negizinen der ýaqytynda ózgerister engizý úshin jobalaý kezeńinde nemese qurylystyń bastapqy kezeńderinde joldyń tehnıkalyq jobasyndaǵy qaýipsizdik qaýpin anyqtaýǵa múmkindik beredi. Al saraptama barysynda usynylatyn jańa nemese jańartylǵan jol ashylǵannan keıin ony paıdalaný deńgeıi baǵalanady.
Mınıstr orynbasarynyń aıtýynsha, aýdıt ınstıtýtyn engizý qaýipsizdikti arttyrýǵa qatysty shyǵyndardy edáýir únemdeýge septigin tıgizedi. Óıtkeni, ondaǵy tájirıbeler jol salý aıaqtalǵannan keıin emes, jol qurylysy barysynda eskeriletin bolady. Bundaı ınstıtýttyń tıimdiligi álemdik tájirıbelerde de baıqalǵan. «Jalpy álemdik tájirıbege súıensek, jol salynyp, ol qoldanysqa berilgennen keıin bir nárseni ózgertýden góri onyń kemshilikterin jobalaý nemese qurylysyn salý kezeńinde joıýdyń edáýir arzan bolatynyn aıǵaqtaıdy. Sondyqtan da, osy aýdıt ınstıtýtyn engizý adamı faktordan bolatyn jol apattaryn azaıtýǵa septigin tıgizedi», - deıdi A. Kúreńbekov.
