ІІM: Jemqorlyqpen kúres máseleleri boıynsha is-sharalar jospary bekitilmek
Búgin Іshki ister mınıstri Erlan Turǵymbaev pen Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaevtyń basshylyǵymen, sondaı-aq qoǵam ókilderiniń qatysýymen arnaıy keńes ótti. Basqosýda ІІM-gin reformalaýdyń Jol kartasy negizinde ázirlengen quqyq qorǵaý organdaryndaǵy jemqorlyqpen kúres máseleleri jónindegi 2019-2020 jyldarǵa arnalǵan is-sharalar Jospary jobasy talqylandy.
Jospardy ázirleý kezinde sońǵy jyldarda, ásirese áleýmettik jelide talqylanǵan qoǵamnyń usynysy sarapqa salynyp, jan-jaqty taldanǵan.
«Polıtsııa ashyq bolýy kerek. Polıtsııa halyqqa jaqyn bolýy tıis. Bul másele búgingi tańda qabyrǵamyzda alǵash ret talqylanyp otyr. Ózderińiz kórip otyrǵandaı, Memlekettik qyzmet isteri jáne sybaılas jemqorlyqqa qarsy is-qımyl agenttigimen birlesip, qoǵam ókilderin qatystyryp úlken máseleni talqylap otyrmyz. Ótken jyly Jol kartasy bekitilip, Elbasynyń tapsyrmasymen Іshki ister organdarynyń jumysyn jandandyrý, halyqpen tyǵyz qarym-qatynasyn kúsheıtýge oraı 9 baǵyt anyqtalǵan bolatyn. Sonyń bir baǵyty - ishimizdegi sybaılas jemqorlyqty tazartý. ıAǵnı, Іshki ister mınıstrliginiń sapynda saýatsyz ári óz basynyń paıdasyn oılaıtyn qyzmetkerlerge oryn joq», - dedi Іshki ister mınıstriniń keńesshisi, ІІM resmı ókili Nurdildá Oraz jınalys kezinde tilshilerge bergen suhbatynda.
Mınıstrdiń keńesshisiniń aıtýyna qaraǵanda, qoǵam belsendileri de bul másele boıynsha kúsh salýda.
«Biz buny budan ary qaraı kópshiliktiń talqysyna shyǵaramyz. Sodan keıin Agenttikpen bekitip, ary qaraı jumys isteıtin bolamyz. Jospar jobasy Іshki ister mınıstrliginiń saıtynda jarııalanady», - deıdi ol.
Nurdildá Oraz sonymen birge jemqorlyqpen kúresýdiń naqty baǵyttary týraly da sóz qozǵady.
«Kóshedegi kameralar, bolmasa qyzmetkerlerdiń keýdesindegi kameralar arqyly baqylaý kúsheıedi. Kez kelgen oqıǵa boıynsha qyzmettik tekseris júrgizip, eger qyzmetkerdiń kinási dáleldenip jatsa, ony jumystan qýýǵa deıin qatań jaza qoldanatyn bolamyz. Qylmyspen kúresýden buryn jemqorlyqtyń aldyn alýǵa mán beremiz», - deıdi ol.