ІІM jaıaý júrginshige salynatyn 70 myń teńge aıyppulǵa túsinik berdi
ASTANA. QazAqparat - QR ІІM Ákimshilik polıtsııasynyń baspasóz hatshysy Irına Lýkıanına jaıaý júrginshilerge qatysty belgilengen qomaqty aıyppul somasy boıynsha túsinik berdi, dep habarlaıdy QazAqparat tilshisi.
Aıta keteıik, messendjerlerde joldyń ruqsat etilmegen jerinen júrip ótkenderge 70 myń teńge somasynda aıyppul salynatyndyǵy týraly aqparat taraǵan bolatyn.
«Árıne, aıyppul somasyna qatysty bul aqparat shyndyqqa saı kelmeıdi. Qazirgi kezde jol erejesin buzǵan jaıaý júrginshiler úshin aıyppul kólemi 2 AEK deńgeıinde. Al jaıaý júrginshilerge qatysty jol erejesin buzylýyn aldyn alý úshin polıtseıler tıisti sharalardy turaqty túrde ótkizip turady», - dep jazdy Irına Lýkıanına Feısbýktegi paraqshasynda.
Onyń atap ótýinshe, elimizde jol-kólik oqıǵalarynyń árbir ekinshisine jýyǵy jaıaý júrginshilerdi qaǵyp ketýge baılanysty bolyp otyr. Sonymen birge, jyl basynan beri 540 oqıǵa jaıaý júrginshilerdiń kinásinen oryn alǵan. Saldarynan 115 adam kóz jumyp, 450 adam túrli dene jaraqattaryn aldy.
«Jól-kólik oqıǵasynda óz kinásinen mert bolǵan jaıaý júrginshilerdiń sany Almatyda, Qaraǵandy jáne Almaty oblystarynda ósti. JKO-nyń negizgi sebepteri joldy ruqsat etilmen bóliginen qıyp ótýden nemese baǵdarshamnyń belgilerin elemegennen bolady», - dedi I. Lýkıanına.
