ІІM jasópirimderdi esirtkige qarsy skrınıngten ótkizýdi usyndy

ASTANA. QazAqparat – Іshki ister mınıstri Marat Ahmetjanov Úkimet otyrysynda jasópirimderdi esirtkige qarsy skrınıngten ótkizýdi usyndy, dep habarlaıdy QazAqparat tilshisi.

«Qazirgi ýaqytta, ókinishke qaraı, esirtki qoldaný faktileri tipti oqýshylar qatarynan anyqtalyp jatyr. Sondyqtan bolashaqta skrınıng ótkizý júıesin engizýdi josparlap otyrmyz. Bul qoǵamnyń nashaqorlyq deńgeıin obektıvti túrde baǵalaýǵa jáne esirtkige táýeldi adamdy, ásirese jasóspirimder arasynda erte bastan anyqtaýǵa múmkindik beredi», - dedi ol Úkimet otyrysynda.

Atalǵan shara «Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi josparynda» qarastyrylǵan.

Mınıstr Úkimet otyrysynan keıin BAQ ókilderine atalmysh sharany qalaı uıymdastyrýǵa bolatynyn túsindirdi. Skrınıngti oqýǵa túserde, jumysqa turar kezde, Qarýly Kúshter qataryna jáne memlekettik qyzmetke alynar aldynda tapsyratyn medıtsınalyq tekserý aıasynda júrgizý usynylyp otyr.

«Saraptama esirtki tutynýshylardy birinshi satyda anyqtasa, ondaı adamdardyń 95 paıyzyn qalypty ómirge oraltýǵa bolatynyn kórsetip otyr. Úshinshi satyda anyqtalǵandardyń 15 paıyzy ǵana (ońalady-red.). Esirtkiniń túri kóp. Tipti mektepte de tarap jatyr, ony biz jasyryp otyrǵan joqpyz. Búginde naqty esebi joq. Men bıomaterıal skrınıngin ótkizýdi usynyp otyrmyn. Negizi bul Densaýlyq saqtaý mınıstrliginiń usynysy. Biz ony qoldadyq. Endi joǵary oqý ornyna túskende, memlekettik jáne áskerı qyzmetke ornalasqanda, jumysqa turǵanda skrınıgten ótý kerek bolady. Qoǵam men balalarymyzdyń qaýipsizdigi mańyzdy ekenin túsinýimiz kerek. Bıomaterıaldardan esirtki anyqtalsa, ákimshilik jaýapkershilikke tartylmaıdy. Ondaı málimet olardyń ata-anasyna jiberiledi», - dedi mınıstr.