ІІM jappaı tártipsizdik kezinde ustalǵandardyń quqyǵy taptalmaıtynyn málimdedi

NUR-SULTAN. QazAqparat – Elimizdiń Іshki ister mınıstrligi jappaı tártipsizdik kezinde ustalǵan azamattardyń quqyǵy zań aıasynda qorǵalatynyn málimdedi, dep habarlaıdy QazAqparat tilshisi.

«Bir apta ishinde adam quqyqtary jónindegi ýákil elimizdiń 12 óńirinde tergeýge alynyp, qamalǵandardy ustaý jaǵdaıyn tekserdi. Atap aıtqanda 12 tergeý ızolıatory, 67 ÝUI jáne APB arnaıy úı-jaıyna bardy. Odan basqa, prokýratýra zańdylyqtyń qamtamasyz etilýin úzdiksiz qadaǵalap otyr. Taǵy bir eske salǵym keletini - tergeý mekemesine jetkizilgen barlyq adam mindetti túrde medıtsınalyq tekserýden ótedi. Qajet bolǵan jaǵdaıda olarǵa tıisti em-dom taǵaıyndalady», - dedi QR ІІM Qylmystyq-atqarý júıesi komıteti tóraǵasynyń orynbasary Meıram Aıýbaev OKQ-de onlaın ótken baspasóz máslıhatynda.

Sondaı-aq, ІІM ókili statsıonarlyq emdeý qajet bolǵan jaǵdaıda patsıent aýrýhanaǵa jiberiletinin aıtty.

«Qurmetti qazaqstandyqtar, komıtette jáne barlyq óńirlik departamentterde call-ortalyq jumys isteıdi. Ortalyqqa habarlasý arqyly siz qamaýǵa alynǵan adamdar týraly jáne ózge aqparatty ala alasyz. Advokattardyń osy ortalyq arqyly málimet alý múmkindigi bar. Azamattardyń konstıtýtsııalyq quqyǵyn qorǵaýǵa qatysty barlyq tıisti sharalar qabyldanyp jatyr», - deıdi ol.

Buǵan deıin komıtet basshysynyń orynbasary tártipsizdik kezinde qamaýǵa alynǵan 31 adamnyń aýrýhanada emdelip jatqanyn málimdegen bolatyn.