ІІM Toqmádıdiń sensatsııalyq málimdemesine oraı tekserý jumystaryn júrgizedi
ASTANA. QazAqparat - QR Іshki ister mınıstrligi Murathan Toqmádıdiń sensatsııalyq málimdemesine baılanysty arnaıy tekserý jumystaryn júrgizetin bolady. Bul jaıynda QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat.
«Buǵan deıin Murathan Toqmádı atalǵan fakti boıynsha Іshki ister mınıstrligine júgingen emes. Erjan Artyqbaev 2010 jyly ІІM Tergeý komıtetiniń Áskerı-tergeý basqarmasy bóliminiń bastyǵy laýazymynda zeınetke shyǵyp, ishki ister organdarynan bosatyldy. Aǵymdaǵy jyldyń 24 qazanyndaǵy M.Toqmádıdiń BAQ-taǵy málimdemesine oraı ІІM Ózindik qaýipsizdik departamenti ózge de quqyq qorǵaý organdarymen ózara is-qımyl jasaı otyryp, sáıkesinshe tekserý júrgizetin bolady», - dedi Almas Sadýbaev.
Aıta ketsek, «KTK» telearnasy ázirlegen «Zvalı ego Mýrka» dep atalatyn fılmniń ekinshi bóliginde sottalǵan bıznesmen Murathan Toqmádı «Turanálem bankiniń» burynǵy basshysy Erjan Tátishovti qashqyn bıznesmen Muhtar Ábilázovtiń tapsyrysy boıynsha óltirgendigin moıyndaǵan edi.
«Qylmystyq isti Erjan Artyqbaev basshylyq jasaǵan QR ІІM-niń jedel tergeý tobyna berdi. Odan maǵan túzý nıet tanytýǵa, tutqyndaý túrinde shara qoldanbaýǵa jáne tergeý barysynda kómek kórsetýge kóndirýge tyrystym. Ol úshin Artyqbaevqa hatqaltaǵa salynǵan aqsha qarajatyn berdim. Menińshe, 20 myń dollar», - degen edi fılm barysynda M.Toqmádı.
