ІІM sherýler kezinde zardap shekken polıtseıler týraly aıtty
NUR-SULTAN. QazAqparat - Qr Ákimshilik polıtsııa komıtetiniń tóraǵasy Maqsat Baıbolov Almaty jáne Nur-Sultan qalalaryndaǵy sherýler kezinde zardap shekken saqshylar týraly málimet berdi, dep habarlaıdy QazAqparat tilshisi.
Ortalyq kommýnıkatsııalar qyzmetinde ótken brıfıngte ákimshilik polıtsııa komıtetiniń tóraǵasy 10-11 maýsym kúnderi Almaty kóshelerinde ne bolǵanyn aıtyp berdi.
«Maýsymnyń 10-ynan 11-ine qaraǵan túninde Almaty qalasynda kólik ıeleri eni 4 metrge deıin jetetin kolonna quryp, Tóle bı jáne Abaı dańǵyldaryndaǵy joldy jaýyp tastaǵan. Osy kóshelerdiń boıynda jaıaý adamdar da toptanyp júrip, qıylystarda kólik keptelisin týǵyzyp, aıqaı-súreńge basqan. Kóbi ózderin óte agressıvti ustady. Al túngi saǵat 1.30-da «Saıran» avtobeketiniń aýdanynda zańsyz aktsııaǵa qatysýshy kólik jol qozǵalysyn rettep turǵan jol-patrýldik polıtsııa qyzmetkerin qaǵyp ketken. Saldarynan polıtsııa ókili oń aıaǵynan jabyq jambas synyǵyn aldy. Júrgizýshi qashpaq bolǵanymen, qolǵa tústi. Oǵan qarsy Qylmystyq kodekstiń 345 baby boıynsha 160 AEK kóleminde aıyppul salý nemese 40 táýlikke qamaý jazasy taǵaıyndalýy múmkin.
Bir top adam mas kúıinde polıtsııa kóliginiń terezesin taspen shaqqan jaǵdaılar da boldy. Zań buzǵandar ustaldy. Zańda mundaı áreketter úshin Qylmystyq kodekstiń 293 baby boıynsha jaza qarastyrylǵan. Osy jaıttardan keıin aıqaı men shýdan úreılengen qala turǵyndarynan 1000-nan astam aryz túskenin aıtý kerek», - deıdi Maqsat Baıbolov.
Onyń aıtýynsha, áleýmettik jeli mesendjerlerinde 11-12 maýsym kúnderi bir ýaqytta birneshe qalada kóshe qozǵalysyna kedergi keltirý úshin arandatý aqparattary taraǵan.
«Tipti polıtsııa ókilderine qarsy turýǵa shaqyrýlar boldy. Buǵan deıin sondaı sherýlerdiń birinde jedel áreket etý jasaǵynyń 1 jaýyngerine qarsy arnaıy daıyndalǵan ballon qoldanylyp, saldarynan eki kózin kúıik shalǵan bolatyn. Budan bólek tas pen taıaq laqtyrý oqıǵalary kezdesti», - deıdi polıtsııa ókili.
Maqsat Baıbolov polıtsııa ókilderiniń áreketinde zań sheńberinen shyǵý bolǵan joq degen málimet aıtty.
«Tipti polıtsııa ókilderine ashyq kúsh kórsetý bolǵan kezde de saqshylar arnaıy quraldardy qoldanǵan joq. Qamaýǵa alynǵan azamatar zańǵa sáıkes Nur-Sultan jáne Almaty qalalarynyń, Aqmola, Almaty, Qaraǵandy oblystarynyń jaqyn aýdandaryna ornalastyryldy. Ol oryndardyń barlyǵyna tekserý júrgizildi. Qamaýdaǵylar tarapynan ustaý sharty men azaptaý faktilerine qatysty shaǵymdar anyqtalǵan joq. Barlyq qamaýdaǵylar medıtsınalyq tekserýden ótkizdi. Eshkim densaýlyq jaǵdaıyna shaǵym aıtpaǵan», - deıdi ákimshilik polıtsııa basshysy.
Komıtet tóraǵasy ruqsat elilmegen sherýge, aktsııalarǵa qatysý zańsyz ekenin qaıtalaı eskertip, adamdardyń qaýipsizdigin shekteıtin sharalarǵa qatysý zańmen qýdalanatynyn atady.
Aıta ketsek, atalmysh brıfıng barysynda bas prokýratýra ókili Saparbek Nurpeıisov saılaýdan keıingi sherýlerge qatysqan adamdardyń qanshasy qamaýǵa alynǵany týraly BAQ ókilderine málimet bergen bolatyn.
