ІІM respýblıka aýmaǵynda «Jumyspen qamtý» jedel-profılaktıkalyq is-sharasyn ótkizedi
ASTANA. Shildeniń 20-sy. QazAqparat /Danıel Shaıynǵazın/ - Іshki ister mınıstrligi bilim jáne halyqty áleýmettik qorǵaý organdarymen birlesip, aǵymdaǵy jylǵy shildeniń 19-23-i aralyǵynda «Jumyspen qamtý» jedel-profılaktıkalyq is-sharasyn ótkizedi, dep habarlaıdy QR ІІM Ákimshilik polıtsııa komıteti.
Іs-sharanyń negizgi maqsaty - jazǵy demalys kezeńinde kámeletke tolmaǵandardyń tarapynan jasalatyn quqyq buzýshylyqtardy eskertý jáne aldyn alý, sondaı-aq ishki ister organdarynyń profılaktıkalyq esebinde turǵan, qolaısyz otbasynyń balalary men jasóspirimderiniń bos ýaqytyn uıymdastyrylǵan nysandarmen qamtý.
Profılaktıkalyq is-sharaǵa qatysýǵa jergilikti atqarýshy organdardyń, prokýratýra, densaýlyq saqtaý organdarynyń, sondaı-aq «Nur Otan» HDP jastar qanaty fılıaldarynyń ókilderi, barlyǵy - 12 myńnan astam adam jumyldyryldy.
Ótkizilip jatqan jedel-profılaktıkalyq is-sharanyń birinshi kúninde eńbek zańnynyń normalaryn buzýmen jumys jasap jatqan 63 kámeletke tolmaǵandar aıqyndaldy, onyń ishinde 18-i oıyn-saýyq oryndarynda, 13-i kólikte, 5-i aýyl sharýashylyǵy qyzmetinde jáne 29-y basqa jerlerde anyqtaldy.
Mysalǵa, Ekibastuz qalasynda 1992 jyly týylǵan kámeletke tolmaǵan A. bazarda jumys istep, oǵan baılanysty eńbek zańdarynyń buzylǵany aıqyndaldy.
Ata-analardyń nemese olardyń oryn aýystyratyn adamdardyń balalardy tárbıeleý mindetterin oryndamaǵany úshin 236 adam, kámeletke tolmaǵandardy alkogoldi mas kúıge jetkizgeni úshin 17 eresek adam jaýapqa tartyldy.
Kámeletke tolmaǵandarǵa alkogoldi ishimdik satýdy júzege asyrǵan 89 saýda oryny anyqtalǵan, 107 saýda kásiporynynyń kámeletke tolmaǵandarǵa temeki satý faktisi tirkelip, olar boıynsha jergilikti atqarýshy organdarǵa usynystar jiberildi.
Іshki ister organdarynyń múddeli vedomstvolarymen birlesip ótkizilgen is-sharalarynyń nátıjesinde aǵymdaǵy jyly kámeletke tolmaǵandardyń arasyndaǵy jasalǵan qylmys 11,9%-ǵa (2252-den 1984-ke) deıin azaıdy.
