ІІM reformasy aıasynda polıtsııa qyzmetkerleriniń KPI kórsetkishi qaıta qaralady - A.Kalaıchıdı
ALMATY. QazAqparat - Qazaqstanda júrgizilip jatqan QR ІІM reformalaý barysynda polıtsııa qyzmetkerleriniń KPI kórsetkishi qaıta qaralatyn bolady. Bul týraly Almatyda ótip jatqan qoǵamdyq keńes músheleriniń otyrysynda QR Prezıdenti ákimshiliginiń quqyq qorǵaý júıesi bóliminiń meńgerýshisi Alekseı Kalaıchıdı aıtty, dep habarlaıdy QazAqparat tilshisi.
«Polıtsııa qyzmetkerleriniń qyzmetin baǵalaý krıterııleri qaıta qaralatyn bolady. ІІM reformalaý tek ıdeıalar men usynystar jıyntyǵy ǵana emes ekenin túsiný kerek. Reformanyń ózi Grýzııadaǵydaı túbirimen ózgeris nemese belgili bir núkteler ǵana ózgerýi múmkin degendi bildiredi. Ár pozıtsııany biz jan-jaqty taldap, talqylaýymyz, zertteýimiz kerek. Qazir jumys toby sonymen aınalysyp jatyr. Únemi shetelge shyǵyp turamyz», - dedi A. Kalaıchıdı.
Sonymen qatar, quqyq qorǵaý organdarynyń keıbir bólimshelerin ońtaılandyrý sharasy kútip tur.
Búginde jumys toby fýnktsıonaldy taldaý jasaýmen, sheteldik tájirıbeni otandyq júıemen salystyrý arqyly, qarjylyq shyǵyndaryn esepteýmen aınalysyp jatyr.
Alekseı Kalaıchıdıdiń aıtýynsha, jańa tártip boıynsha bólimshelerdiń kórsetkishi tómen bolsa nemese qolastyndaǵylar sybaılas jemqorlyqpen aınalysatyn bolsa, jetekshiler qyzmetinen ketetin bolady.
Sonymen qatar, polıtsııa qyzmetkerleriniń qarjylyq jaǵdaıy men áleýmettik qorǵalýyna qatysty esepteýler júrgizilip jatyr.
