ІІM otbasyndaǵy janjal kezinde polıtsııaǵa belgi berý úshin ym-ıshara tilin qoldanýdy usyndy

ASTANA. QazAqparat – Іshki ister mınıstrligi otbasylyq jáne turmystyq zorlyq-zombylyq qurbandaryna kómek suraý kezinde halyqaralyq deńgeıde moıyndalǵan ym-ıshara tilin qoldanýdy usynady, dep habarlaıdy QazAqparat tilshisi.

«Biz zańnamany jetildirý aıasynda tıisti algorıtmderdi ázirledik. Polıtsııa qyzmetkeri kelgen kezde bastysy – ol jábirlenýshi men agressordy ajyrata alýy tıis. Bul - mindetti ereje jáne ol agressor tarapynan jasalýy múmkin qysymnyń aldyn alýǵa baǵyttalǵan. Keıin quqyq qorǵaý organdarynyń qyzmetkerleri zorlyq-zombylyq qurbanyn sabyrǵa shayqyryp, mán-jaıdy anyqtaı bastaıdy. Osy oraıda biz azamattarǵa mynany jetkizgimiz keledi: eger ómirińizge qaýip tónip turǵanyn aıtý múmkindigi bolmasa, onda halyqaralyq ym-ıshara tilin qoldaný qajet. Eger adam bas barmaǵynyn alaqynyna qaraı búgip, qalǵan tórt saýsaǵymen qolyn judyryq etip jumsa, ol azamatqa qaýip tónip turǵanyn jáne kómek qajet ekenin bildiredi», - dedi ІІM Ákimshilik polıtsııa komıteti tóraǵasynyń orynbasary Renat Zulqaıyrov OKQ-de ótken brıfıngide.

Qosa ketsek, 1 shildeden bastap otbasylyq zorlyq-zombylyq áreketterine qatysty Ákimshilik quqyq buzý týraly kodekske ózgeris enedi.

Atap aıtqanda, endi ákimshilik is qozǵaý úshin jábirlenýshiniń aryzy qajet emes.

Ol kórshiler men kýágerlerdiń aıǵaqtaryna negizdeledi. Sondaı-aq, jábirlenýshi men agressorǵa qaıta tatýlasý múmkindigi berilmeıdi.