ІІM ókili eldegi esirtki saýdasynyń negizgi kózderin atady

NUR-SULTAN. QazAqparat – Іshki ister mınıstrligi Esirtki qylmysyna qarsy is-qımyl departamentiniń basqarma bastyǵy Baqytjan Ámirhanov Qazaqstanda esirtki saýdasynyń damýyna yqpal etip otyrǵan faktorlardy atady, dep habarlaıdy QazAqparat tilshisi.

«Bıyl quqyq qorǵaý organynyń qyzmetkerleri esirtkimen baılanysty zań buzýdyń 3,5 myń faktisin anyqtady. Onyń myńnan astamy – esirtkimen baılanysty qylmystar. 750 esirtki satý, 200 asa iri kólemde esirtki saqtaý faktisi tirkeldi. Shamamen 2 tonna (1,9) túrli esirtki ónimi tárkilendi. Onyń 4 kelige jýyǵy geroın, 41 kelisi sıntetıkalyq eskitki bolǵan», - dedi basqarma basshysy.

Onyń sózine qaraǵanda, jyl basynan beri esirtki saýdasyna qatysy bar 6 uıymdasqan qylmystyq top áshkerelenip, serkeleriniń ústinen 12 qylmystyq is qozǵalǵan. Toptardyń 3 basshysy, 30 múshesi qylmystyq iske tartylyp, kontarbandanyń 50 faktisi anyqtalǵan.

«Qazaqstandaǵy esirtki saýdasynyń damý úrdisi mynadaı jaıttardan qalyptasyp otyr. Birinshiden, Jambyl oblysyndaǵy Shý jazyǵynda kannabıstiń shıkizat bazasy bar. Sondaı-aq, Qyzylorda oblysynda sora ósirý tyıylmaı otyr.

Aýǵanstannan keletin geroınniń «soltústik marshrýt» boıynsha ótetin trafıgi ortalyq Qazaqstan aýmaǵy arqyly Reseı men Eýropaǵa baǵyttalady. Іrgeles elderden sıntetıkalyq esirtkiniń kontrabandasy keledi. Qazaqstannyń óz ishinde de sıntetıkalyq esirtki óndirisin zerthanalyq jaǵdaıda jolǵa qoıý talpysy azaımaı tur», - dedi departament ókili.