ІІM mınıstri elordadaǵy avtobýs apatyna qatysty pikir bildirdi
NUR-SULTAN. QazAqparat - QR Іshki ister mınıstri Erlan Turǵymbaev taıaýda elordada 3 jolaýshylar avtobýsy soqtyǵysqan jol apatyna qatysty pikir bildirdi, dep habarlaıdy QazAqparat tilshisi.
«Sotqa deıingi medıtsınalyq saraptama júrgizilip jatyr. Barlyqtaryńyz da «Sergek» kameralarynyń arqasynda avtobýstyń qalaı soǵylǵanyn kórdińizder. Eger tejegishi isten shyqsa, júrgizýshi apatty boldyrmaýdyń ózge sharalaryn qabyldaıtyn edi. Medıtsınalyq saraptama júrgizilip jatyr. Ol júrgizýshi óliminiń sebebin kórsetip beredi», - dedi mınıstr Úkimet otyrysynan keıin BAQ ókilderine bergen suhbatynda.
Sonymen qatar ol avtobýsqa da tehnıkalyq saraptama júrgizilip jatqanyn aıtty.
«Avtobýstyń aldyńǵy bóliginiń talqany shyqqan. Menińshe, bir aıdyń ishinde jaýabyn beremiz», - dedi E.Turǵymbaev.
Aıta keteıik, keshe elordada úlken jol-kólik apaty boldy. Qala mańyna qatynaıtyn júrdek avtobýs qatty jyldamdyqpen baǵdarshamda turǵan avtobýsqa soǵyldy. 301- baǵdardyń júrgizýshisi jáne aldyńǵy orynda otyrǵan bir jolaýshy oqıǵa ornynda kóz jumdy.
Jol apatynan 36 adam jaraqat aldy. Bir áıeldiń aıaǵy ampýtatsııalandy
