ІІM qyzmetkerleriniń 90%-dan astamy vaktsına aldy
NUR-SULTAN. QazAqparat - Polıtseıler men qylmystyq-atqarý júıesi qyzmetkerleriniń 90%-dan astamy COVID-19-ǵa qarsy josparly vaktsınatsııadan ótti, dep habarlaıdy Qazaqstan Respýblıkasy ІІM baspasóz qyzmeti.
Mınıstr Erlan Turǵymbaev bastaǵan ІІM basshylyǵy da vaktsına aldy. Elimizdiń bas polıtseıiniń aıtýynsha, jeke quramdy vaktsınatsııalaý osy jyldyń 6 naýryzynan bastap júrgizilýde jáne ishki ister organdarynyń barlyq fýnktsıonaldyq jáne aýmaqtyq bólimshelerin, onyń ishinde qylmystyq-atqarý júıesiniń uıymdaryn, ishki áskerler men ІІM oqý oryndaryn qamtydy.
Polıtsııa qyzmetkerleri qylmystardy ashý jáne tergeý, oqıǵa oryndaryn tekserý, tergeý áreketterin júrgizý boıynsha qyzmet atqarady, joldardaǵy qaýipsizdikti qamtamasyz etedi, sondaı-aq sanıtarlyq beketterde qyzmet etedi. Budan basqa, medıtsına qyzmetkerlerimen birge karantındik sharalardy qamtamasyz etýge qatysady. Sondyqtan COVID-19 juqtyrý qaýpi bar.
«Jumystyń ereksheligin eskere otyryp, ishki ister organdarynyń qyzmetkerleri, medıtsına qyzmetkerleri sııaqty, koronavırýsqa qarsy vaktsınatsııanyń basym tobyna kiredi. Bul ózińizdi jáne jaqyndaryńyzdy qorǵaýǵa, ádettegi ómir saltyna tezirek oralý úshin ujymdyq ımmýnıtetti qalyptastyrýǵa múmkindik beretin qajetti shara», - dep atap ótti mınıstr.
Vaktsınatsııa týraly sheshimdi árkim óz betinshe qabyldaıdy. Ekpe alýǵa nıet bildirgen qyzmetkerler aldyn ala tekserýden ótedi. Medıtsınalyq qarsy kórsetilimderi bar adamdar vaktsınatsııalaýǵa jatpaıdy.
Vaktsınatsııa jumystary jalǵasýda jáne turaqty baqylaýda.
