ІІM qurylymynda adam saýdasyna qarsy kúresetin arnaıy basqarma ashylady
NUR-SULTAN. QazAqparat – Іshki ister mınıstri Erlan Turǵymbaevtyń aıtýynsha, elde adam saýdasyna qatysty 107 qylmys tirkelgen, dep habarlaıdy QazAqparat tilshisi.
«Adam saýdasyna qatysty qylmysty tergeý tájirıbesi jetildirilip keledi. Jyl basynan beri elde mundaı sanatta 107 qylmys tirkeldi. Sotqa 58 qylmystyq is joldandy. Kóp jaǵdaıda bul qylmystar uıymdasqan jáne transulttyq sıpatqa ıe. Osyǵan baılanysty uıymdasqan qylmysqa qarsy kúres departamentin quryp, onyń qurylymynda adam saýdasymen kúres basqarmasyn ashý kózdelip otyr», - dedi Erlan Turǵymbaev Memleket basshysynyń Qazaqstan halqyna joldaýynda aıtylǵan tapsyrmalaryn iske asyrý barysy týraly ótken baspasóz máslıhatynda.
Eske sala ketsek, buǵan deıin Memleket basshysy Qasym-Jomart Toqaev adam saýdasyna qatysty máselege jeke toqtalyp, bul baǵytta tirkeletin qylmystardy anyqtaý úshin naqty sharalardy qabyldaýdy tapsyrǵan bolatyn.
«Adam quqyǵyn qorǵaý – kún tártibinde . Bul másele boıynsha turaqty túrde jumys júrgizýimiz kerek. Bul adam saýdasymen kúreske de qatysty. Bul rette sheshilmeı jatqan másele kóp. Tipti jaǵdaı kúrdeli dep te aıtýǵa bolady. Adam saýdasy týraly halyqaralyq reıtıngter men baıandamalarda Qazaqstannyń jaǵdaıy onsha emes. Men bul máselege Joldaýda jeke toqtaldym. Endigi kezekte barlyq ýákiletti organdardyń batyl ári úılesimdi áreketi kerek. Qazaqstannyń zańnamasyn halyqaralyq standarttarǵa saı beıimdegen abzal», - dedi Prezıdent Ulttyq qoǵamdyq senim keńesiniń otyrysynda.
