ІІM qurylymdaryn ońtaılandyrý: Shildeden bastap kimderdiń jalaqysy ósedi
NUR-SULTAN. QazAqparat - Іshki ister mınıstri Erlan Turǵymbaev vedomstvoda ońtaılandyrý jumystary qalaı júrgiziletini týraly aıtty, dep habarlaıdy QazAqparat tilshisi.
«Elbasynyń tapsyrmasy negizinde ishki ister organdaryn 2019-2021 jyldary jańǵyrtý boıynsha Jol kartasy ázirlenip, iske asyrylyp jatyr. Alǵashqy kezeńde birshama qurylym taratyldy. Onyń ishinde, QR ІІM 105 bólimshesi taratylyp, organdar men qurylymdyq bólimsheler sany 10 myń birlikke qysqardy», - dedi mınıstr halyqqa esep berý kezdesýinde.
Erlan Turǵymbaevtyń aıtýyna qaraǵanda, artyq dep tanylǵan basqarýshylyq bólimder qysqartylyp, 1180 basshylyq laýazym joıylǵan.
«Básekeli ortaǵa 32 nysan berildi. Ol nysandardyń barlyǵy kúzet qyzmetindegi mamandandyrylǵan kúzet kompanııalarǵa berilgenin atap ótý kerek. Osy ózgeristerdiń artynsha 100 myń halyqqa eseptegende polıtsııa qyzmetkerleriniń sany 471-den 393-ke azaıdy. Osy ońtaılandyrýdan túsken qarajat patrýldik polıtsııa qyzmetkerleriniń aılyǵyn 65 paıyzǵa, jedel qyzmetkerler men tergeýshilerdiń aılyǵyn 55 paıyzǵa, ýchaskelik polıtseıler men JOO muǵalimderiniń aılyǵyn 25 paıyzǵa, ózge de qyzmetkerlerdiń aılyǵyn 20 paıyzǵa arttyrýǵa jumsalady», - dedi ol.
Sonymen qatar, baspana úshin ótemaqy alatyn qyzmetkerlerdiń tizimi uzartylǵan.
«Jedel jáne tergeý bólimsheleriniń narıadtarymen birge mundaı quqyqqa ýchaske polıtseıleri, jasóspirimder isi jónindegi ıspektorlar men patrýldik polıtsııa qyzmetkerleri ıe boldy», - dedi Erlan Turǵymbaev.
