ІІM Kóliktegi ishki ister departamentiniń 3 myńǵa jýyq qyzmetkeri kezekten tys attestattaýdan ótedi

Bul týraly atalmysh departamenttiń baspasóz qyzmeti habarlady. 

 «Elbasynyń ústimizdegi jylǵy 27 qańtardaǵy Qazaqstan halqyna arnaǵan Joldaýynda atap ótilgendeı, 2012 jyldyń 1 shildesine deıin respýblıkamyzdyń quqyq qorǵaý jáne arnaıy qyzmetteri qaıta attestattaýdan ótkizilmek. Olardyń qatarynda Kóliktegi ishki ister departamentiniń jeke quramy da bar.  Bul shara quqyq qorǵaý organdarynyń qataryn sapaly kadrlyq jańartýdan ótkizýge, osy arqyly polıtsııaǵa kezdeısoq kelgen adamdardy anyqtaýǵa zor múmkindik beretini aqıqat. Bul óz kezeginde polıtsııa jumysynyń sapasynyń arta túsip, qylmystarǵa qarsy kúreste belgili bir nátıjelerge qol jetkize alatynymyzǵa kepildik bola almaq»,-delingen baspasóz baıanynda.

 Sondaı-aq ondaǵy málimetter boıynsha, Elbasynyń quqyq qorǵaý organdaryn kezekten tys attestattaýdan ótkizý jónindegi bastamasyn júzege asyrý úshin Іshki ister mınıstrliginiń Kóliktegi ishki ister departamenti qyzý daıyndyq sharalaryn júzege asyrýda. Keste boıynsha departament basshylyǵy attestattaýdan Іshki ister mınıstrliginde, Departamenttiń jeke quramy tikeleı ózi qyzmet atqaratyn mekemede ótedi. Al jergilikti jerlerdegi basqarmalar men derbes bólimderdi Departament qyzmetkerlerinen quralǵan arnaıy top ókilderi tekseredi.

 Kóliktegi ishki ister departamentiniń bastyǵy polıtsııa polkovnıgi Janat Súleımenovtyń aıtýynsha, attestataýdan Kóliktegi ishki ister departamentiniń 3 myńǵa jýyq jeke quramy tolyqtaı ótedi. Bul sharaǵa tek aıaǵy aýyr áıelder men bala kútiminde otyrǵandar, aýyr dertke shaldyǵyp, emdelip júrgender qamtylmaıdy. Sonymen qatar, qyzmet ótkerý jasy kelip qalǵan, zeınetkerlik jasqa jetkender attestattaýdan ótýge deıin aryz jazyp, ishki ister organdary sapynan shyǵa alady. Qyzmette qalamyn degen osy sanattaǵy qyzmetkerler attestattaýdan ótedi.

Bul shara 10 mamyr kúni bastalady.