ІІM kólik quraldaryna senimhattardy mindetti túrde tirkeýden bas tartpaıtyn bolady
ASTANA. 12 aqpan. QazAqparat - Іshki ister mınıstrligi kólik quraldaryna senimhattardy mindetti túrde tirkeýden ótkizýden bas tartpaıtyn bolady. Búgin Parlament Májilisinde «Jol júrisi týraly» jańa zań jobasyn talqylaý barysynda Іshki ister mınıstriniń orynbasary Erlik Kenenbaev osylaı málim etti.
«Rasynda da, búgingi tańda elimizde kólik quraldaryn basqarýǵa senimhattar tirkelýge mindetti. Biz ondaı tirkeýden bas tarta almaımyz. Onyń ózindik sebepteri de bar. Máselen, osy jaıynda áńgime bolǵanda Reseı men Ýkraına sekildi elderdiń tájirıbesi alǵa tartylady. Alaıda, ol elderdegi halyq sany esepke alynbaı otyrǵanyn eske salǵym keledi. Qazaqstanda 14 mln. halyqqa 4 mln.-ǵa tarta avtokólikten tıedi. ıAǵnı, elimizdegi eresekteriniń árqaısysynda bir kólikten bar degen sóz», - deıdi E. Kenenbaev. Onyń aıtýynsha, Qazaqstanda kólik quralyna senimhatty tirkeý alyp tastalsa, onda avtokólik ıesin izdeýde kóp qıyndyqtar týyndaıtyn edi. Sondaı-aq, senimhatty alyp tastaý jol-kólik oqıǵasyna qatysty naǵyz kinálini anyqtaý barysyna da teris áserin beredi.
«Bizdiń elimizde basqa elderge qaraǵanda jol-kólik apaty shyn máninde jyl saıyn órship tur. Endeshe biz bundaı jaǵdaıda senimhatty tirkeýdi alyp tastaı almaımyz. Eger biz bul máseleni júgensiz óz jónimen jibersek, onda jaǵdaı tipti ýshyǵyp ketýi yqtımal. Sondyqtan da biz kólik basqarýǵa qatysty senimhatty tirkeýden bas tarta almaımyz ári buǵan májbúrli túrde baramyz. Sosyn bizdegi ınfraqurylym, bizdiń joldarymyz, sondaı-aq júrgizýshilerdiń mentalıteti de bundaı mindetti tirkeýge májbúr etetinin eske salǵym keledi», - dedi E. Kenenbaev.
Toqtala ketetin jaıt, qujatty talqylaý barysynda depýtattar kólik quraldaryna senimhattardyń mindetti túrde tirkeýden ótýi júrgizýshilerdiń jumysyn qıyndatynyn aıtqan edi. Sonymen qatar, tirkeýdi joıý týraly máseleni Májilis depýtattary ótken jylǵy Іshki ister mınıstri aldynda da kótergen edi. Biraq, ol kezde mınıstr Qalmuhamed Qasymov vedomstvonyń senimhattardy joıýǵa daıyn emestigin, óıtkeni jol polıtsııasyna barlyq kólikter men olardyń ıeleriniń esebin elektrondy bazaǵa tolyq kirgizý úshin ýaqyt kerektigin alǵa tartqan edi.
Sonymen qatar, Eýro odaq elderinde, AQSh-ta, Reseıde, Ýkraınada, Belarýsta, Baltyq jaǵalaýy elderinde bundaı tirkeý múldem alynyp tastalǵan jáne kólik quralyn basqarý úshin tek qana úsh qujat - júrgizýshi kýáligi, tehnıkalyq tólqujat jáne saqtandyrý polısi suralady.
