ІІM: Qazaqstanda Jańa jyl merekesi tynysh ótti
NUR-SULTAN. QazAqparat – Іshki ister mınıstrligi Qazaqstannyń búkil óńirinde mereke kúnderi tynysh ári oqys oqıǵasyz ótkenin jarııa etti. Jańa jyl keshinde polıtsııa qyzmetkerleri ótken jyldaǵy merekege qaraǵanda 13,5 paıyzǵa az quqyqbuzýshylyqty tirkegen, dep habarlaıdy QazAqparat tilshisi mınıstrliktiń baspasóz qyzmetine silteme jasap.
Jańa jyl keshinde búkil el boıynsha polıtsııa men Ulttyq ulannyń 30 myńǵa tarta qyzmetshileri halyqtyń qaýipsizdigin qamtamasyz etip, qyzmet atqardy. Jedel basqarý ortalyǵynyń qyzmetkerleri qalalar men oblys ortalyqtarynyń kóshelerindegi jaǵdaıdy baqylaýǵa aldy. QR Іshki ister mınıstri Erlan Turǵymbaev elordalyq garnızon bólimshelerin ózi aralap, mereke kezinde qyzmetke kirisken narıadtardyń jumysyn tekserdi.
«Nur-Sultan qalasyndaǵy kóshelerde bir jarym myń qyzmetker jumys istedi. Jedel basqarý ortalyǵy qaladaǵy jaǵdaıdy baqylaýda ustady. Narıadtar kelip túsken barlyq shaqyrýlarǵa jedel jaýap berdi. Qazirgi ýaqytta myńǵa jýyq shaqyrtý kelip tústi, negizinen ákimshilik quqyq buzýshylyqtar tirkelýde: tynyshtyqty buzý, otbasylyq janjaldar, qaraýsyz qalǵan zattar men shaǵyn jol-kólik oqıǵalary tirkeldi», – dep atap ótti mınıstr Erlan Turǵymbaev.
Tártip saqshylary elimizdiń barlyq óńirinde úlken merekelik demalys kúnderi negizinen usaq urlyqtar, turmystyq janjaldar, tynyshtyqty buzý jaǵdaılary tirkegen.
Máselen, Nur-Sultanda Jańa jyl keshinde polıtsııanyń «102» shuǵyl shaqyrý pýltine eki myńnan astam qońyraý túsken. Al jyl bastalǵaly elordalyq polıtseıler 10 mas júrgizýshini ustaǵan.
Qostanaı oblysynda jumys kúnderi kezekshi bólimge orta eseppen 400 habarlama kelip túsedi. Al 1 qańtarda polıtseıler 650 qońyraý boıynsha jumys júrgizgen. Oblys ortalyǵynda demalys kúnderi 28 jol-kólik oqıǵasy tirkelgen.
Jańa jyl merekesi kúnderi Semeıdegi «102» pýltine bir jarym myńnan astam qońyraý tústi. Onyń 20-sy boıynsha qylmystyq quqyqbuzýshylyq faktisi oryn alǵan.
Túrkistandaǵy «102» pýltine Jańa jyldyń alǵashqy úsh kúninde 100-den astam qońyraý kelip tústi. Tártip saqshylary 300-ge jýyq ákimshilik buzýshylyqty tirkedi. Olardyń basym kópshiligi-jol qozǵalysy erejelerin buzýǵa qatysty bolǵan.
Qyzylorda oblysynda Jańa jyldyń alǵashqy kúnderinde polıtsııa qyzmetkerleri 34 qylmystyq quqyqbuzýshylyqty tirkedi. Olardyń 23-i jedel ashyldy. Qoǵamdyq oryndarda mas kúıinde 50 adam ustaldy. Tynyshtyqty buzýdyń 10 faktisi anyqtaldy. Bes júrgizýshi mas kúıinde rólge otyrǵan.
