ІІM: Qazaqstanda krımınogendik shynaıy jaǵdaıǵa saı keletin statıstıkaǵa qol jetkizildi
ASTANA. 24 maýsym. QazAqparat - Qazaqstanda krımınogendik shynaıy jaǵdaıǵa saı keletin statıstıkaǵa qol jetkizildi. Bul týraly búgin elordada QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda Іshki ister mınıstri Qalmuhanbet Qasymov málim etti.
«Biz ekinshi jyl qatarynan Bas prokýratýramen birlese otyryp, qylmystardy esepke alý jáne tirkeý baǵytynda qatań tártip ornatyp otyrmyz. Bizdiń mindetimiz - qylmystardy esepke alý men tirkeýdiń tolyqtyǵyn qamtamasyz etý. Azamattardyń polıtsııaǵa joldaǵan árbir ótinishin tirýkeý, keıin ótinishke sáıkes jumystar júrgizý. Munsyz polıtsııa azamattardyń senimine ıe bola almaıdy», - dedi mınıstr Qalmuhanbet Qasymov.
Degenmen, vedomstvo basshysy shynaıy statıstıkaǵa qol jetkizý mindeti ońaı júzege aspaǵanyn alǵa tartady. «Óıtkeni, burynǵy keńestik kezeńnen beri mılıtsııadan negizinen qylmysty azaıtý men onyń ashylý kólemin ulǵaıtýǵa qatysty elimiz úshin «jaǵymdy kórsetkish» talap etiletin. Keńes odaǵy ydyraǵannan keıin de qazaqstandyq polıtsııa mundaı tájirıbeden birden kete almady. Sóıtip, 25-30 paıyzǵa jýyq qylmystar jasyrylyp keldi. Máselen, 1993-1994 jyldary tirkelgen qylmystardyń sany 200 myńnan asyp, keıin bul kórsetkish jylma-jyl qysqara bastady. Tipti osy jyldardaǵy qylmystardyń ashylý kórsetkishi 70-80 paıyzǵa deıin jetti. Árıne, bul shynaıy statıstıka emes, kerisinshe statıstıkalyq aıla-tásil ǵana bolatyn. Biz bárin basynan, qylmystar men quqyq buzýshylyqtar týraly azamattardyń ótinishterin jasyrmastan tirkeýden bastadyq», - dedi mınıstr.
