ІІM qaza tapqan batyrlardyń otbasyn qaraýsyz qaldyrmaıdy - Turǵymbaev

NUR-SULTAN. QazAqparat - Іshki ister mınıstri Erlan Turǵymbaevtyń tapsyrmasy boıynsha búginde atyraýlyq polıtsııa serjanty Shalqar Aqymǵalıevti este qaldyrý sharalary polıtsııanyń barlyq bólinisterinde jan-jaqty júrgizilýde, dep habarlaıdy ІІM baspasóz qyzmeti.

Ol qyzmettik boryshyn óteý kezinde sýǵa batyp bara jatqan qyzdy qutqaram dep qaza tapqan edi.

Óńirlik polıtsııa departamentterinde patrıottyq tárbıe saǵattary ótkizilýde, sonyń aıasynda batyr týraly beınerolıkter túsirý jumystary uıymdastyrylyp, qyzmetkerler Shalqar Aqymǵalıevke jyr joldary men mýzykalyq shyǵarmalaryn arnady.

Sh. Aqymǵalıevtiń otbasyna materıaldyq kómek kórsetýdi mınıstr basty nazarda ustap otyr. Soǵan sáıkes, qapııada kóz jumǵan polıtsııa serjantynyń otbasy Іshki ister organdary qyzmetkerlerin áleýmettik qoldaý qorynyń qamqorlyǵyna alyndy.

Sonymen qatar, ІІM ortalyq apparaty men óńirlik Polıtsııa departamentteri, qylmystyq-atqarý júıesi, qutqarý qyzmeti jáne Ulttyq ulan jaýyngerleri Shalqardyń otbasyna materıaldyq qoldaý kórsetýde.

Іshki ister mınıstri jáne ІІM óńirlik bólinisteriniń basshylary qaza bolǵan qyzmetkerdiń otbasyna kóńil aıtý jedel hatyn joldady. Arnaıy ashylǵan esep-shotqa qyzmetkerler erikti túrde búginge deıin 29 mıllıon teńgeden astam qarjy aýdardy.

Erlikpen kóz jumǵan qyzmetkerlerdiń otbasyna ózge de kómekter aldaǵy ýaqytta da turaqty jasalatyn bolady, - dep atap ótti ishki ister mınıstri Erlan Turǵymbaev.

Eske sala keteıik, bıylǵy jylǵy 21 naýryzda Atyraý qalasynda patrýldik ekıpaj quramynda júrgen polıtsııa serjanty Shalqar Aqymǵalıev kópirden Jaıyq ózenine sekirgen qyz jaıly habarlama alǵan boıda oılanbastan muzdy sýǵa qoıyp ketti. Sóıtip qyzdyń ómirin ajaldan arashalap qalǵan edi. Alaıda, ózi qatty aǵynnyń ishinde arpalysyp júrip, kóz jumdy.

Shalqar Aǵymǵalıev 1994 jyly 1 sáýirde dúnıege kelgen. Atyraý oblysy Inder aýdanynyń týmasy. Ol kóp balaly otbasynyń jalǵyz asyraýshysy edi. Otbasyn quryp úlgermegen. Polıtsııa qatarynda qyzmet atqaryp júrgenine 5 jyldan asqan.

Jalpy, Táýelsizdik alǵan jyldardan beri 2264 polıtsııa qyzmetkeri qaza tapsa, sonyń 785-i qyzmettik boryshyn óteý kezinde, 73-i qaýipti qylmyskerdi ustaý operatsııasy barysynda erlikpen jan qıdy. Sondaı-aq 2419 polıtsııa qyzmetkeri jaraqattanǵan. Sonyń ishinde 899-y qylmyskerdi ustaý barysynda jaralandy.

El-jurty, ishki ister organdary erjúrek batyrlaryn árdaıym qurmet tutady, rýhyna taǵzym etedi. Olardyń erlik isteri eshqashan umytylmady.