ІІM kásipkerlerdi balalar batýtynyń jumysyn ýaqytsha toqtatýǵa shaqyrdy
«QR Іshki ister mınıstrligi jeke kásipkerlerdi aýa raıy jaqsarǵanǵa deıin balalar batýtynyń jumysyn ýaqytsha toqtatýǵa shaqyrady. Jeldiń kúsheıýi saldarynan balalar oınap júrgen batýttarda qaıǵyly oqıǵalar oryn alýy múmkin», - delingen atalǵan vedomstvo taratqan aqparatta.
Sonymen qatar, mınıstrlik málimetine qaraǵanda, qazirgi ýaqytta jergilikti atqarýshy organdar balalar kóńil kóteretin jerlerdiń, atap aıtqanda batýttar ornatylǵan jerlerdiń, balalar alańdarynyń, velesıped jalǵa beretin oryndardyń qaýipsizdik erejesine sáıkestigin shuǵyl arada tekserip jatyr.
Aıta keteıik, búgin Qaraǵandy qalasynyń Ortalyq saıabaǵynda kúshti jelden úrlemeli batýt aýdarylyp, oqıǵa saldarynan jaraqat alǵan 12 jastaǵy bala oqıǵa ornynda kóz jumdy. Atalǵan oqıǵaǵa baılanysty qylmystyq is qozǵaldy. Búgin sondaı-aq, Jańaózende de qatty jel batýtty aýdaryp jibergen.