ІІM qarý saqtaý talaptarynyń qataıtylǵanyna baılanysty qarý ıelerine úndeý jasady
ASTANA. QazAqparat - Búgin QR Іshki ister mınıstrligi azamattyq qarý ıelerine arnap úndeý joldady.
Úndeýde sońǵy jyldary Qazaqstan aýmaǵynda páter urlyǵy faktileri jıilep ketkenin, al ondaı urlyq barysynda azamattyq qarýlar qoldy bolyp jatqany aıtylady. Osyǵan oraı, Іshki ister mınıstrligi urlanǵan qarýdyń zańsyz aınalymǵa túsýine jáne ony paıdalana otyryp qylmystar jasalýy múmkindigine alańdaýshylyq bildiredi.
«Tek ótken jyly jáne aǵymdaǵy jyldyń basynan bastap respýblıka boıynsha páter urlyǵy nátıjesinde bir myń birlikten astam azamattyq qarý, olardyń ishinde 49 birlik oıyq uńǵyly ańshylyq qarý urlanǵan. Bul rette urlyqtyń 30% qarý ıesiniń qarýdy saqtaýǵa nemquraıly qaraǵandyǵy nátıjesinde oryn alyp otyr», - delingen úndeýde.
Osyǵan baılanysty Іshki ister mınıstrligi azamattyq jáne qyzmettik qarý men onyń patrondarynyń aınalymyn baqylaý salasyndaǵy ýákiletti memlekettik organ retinde qarý ıelerine qarý men onyń patrondaryn saqtaýdy qamtamasyz etý boıynsha qosymsha talaptardy belgilengenin eske salady. Atap aıtqanda, Qarý men onyń patrondary aınalymynyń erejesine engizilgen ondaı túzetýler boıynsha QR Úkimetiniń 2014 jylǵy 17 sáýirdegi №363 qaýlysy qabyldandy, ol alǵashqy resmı jarııalanǵan kúninen bastap kúntizbelik jıyrma bir kún ótken soń qoldanysqa engiziledi.
«Osy qaýlyda qalalyq eldi mekenderde (respýblıkalyq, oblystyq jáne aýdandyq mańyzy bar qalalar, sondaı-aq olardyń ákimshilik baǵynysynyń aýmaǵyndaǵy kentter) turatyn azamattyq qarý ıesi úshin qarý saqtaıtyn úı-jaılardy páter urlyǵyna ýaqtyly den qoıýǵa jáne qylmyskerlerdi ustaýǵa múmkindik beretin, úı-jaılardy kúzetý júıesiniń bolýy jáne paıdalaný boıynsha mindetti talaptar engizilgen. Qazir úı-jaılardy kúzetýdiń, qadaǵalaýdyń jáne baqylaýdyń zamanýı júıeleri, pýlttik jáne avtonomdy dabyl qaqqyshtar keń taralǵan. Osyny eskere otyryp, azamattyq qarý ıelerine osyndaı júıelerdi, sondaı-aq qarý saqtalatyn bólmeni ne seıfti dabyl berýmen jabdyqtaýdy tańdaý quqyǵy beriledi.
Osyǵan oraı, azamattyq qarý ıeleri Úkimettiń qaýlysynyń kúshine engen kúninen bastap jáne 2014 jylǵy 30 qyrkúıekke deıingi merzimde qarý saqtalatyn úı-jaılarǵa kúzet júıesin ornatýy kerek. Sonymen qatar, Іshki ister mınıstrligi, «Jekelegen qarý túrleriniń aınalymyna memlekettik baqylaý jasaý týraly» Qazaqstan Respýblıkasynyń 1998 jylǵy 30 jeltoqsandaǵy Zańynyń 16-babynyń 2-tarmaǵyna sáıkes qarý ıeleri qarý men onyń patrondarynyń saqtalýyn qamtamasyz etýge mindetti ekendigin eskertedi. Qarýdy saqtaý erejesin buzǵany úshin ákimshilik jaýapkershilikke kózdelgen, al atys qarýyn ony basqa adamnyń paıdalanýy úshin jaǵdaı týǵyzǵan uqypsyz saqtaý, eger ol aýyr zardaptarǵa ákep soqsa qylmystyq jaýapkershilik kózdelgen»,- delingen úndeýde.
