ІІM: Qańtar tragedııasy týraly jalǵan aqparat taratqan 43 sheteldik akkaýnt belgili boldy

NUR-SULTAN. QazAqparat – Qańtar tragedııasynyń saldary týraly jalǵan aqparat taratqan 43 sheteldik akkaýnt anyqtalǵan. Bul týraly Іshki ister mınıstrligi Tergeý departamentiniń bastyǵy Sanjar Ádilov málim etti, dep habarlaıdy QazAqparat tilshisi.

«Qaıǵyly qańtar oqıǵalarynan keıin qoǵam sanasyna áser etý úshin aqparattyq soǵys óris aldy.

Resmı organdardyń eskertýine qaramastan, áleýmettik jeli arqyly quqyq qorǵaý organdarynyń qyzmeti týraly kórineý jalǵan aqparat taratý jaǵdaılary jıilep ketti.

Aqparattyq shabýyldardyń túpki maqsaty – quqyq qorǵaý organdarynyń bedelin túsirý ǵana emes, sondaı-aq Qazaqstan Respýblıkasynyń memlekettik qurylysyn turaqsyzdandyrý.

Aqparattyq shabýyldardyń basym bóligi elden tys jerlerden jasalady. Búgin shetelde tirkelgen 43 akkaýnt anyqtaldy», - dedi departament bastyǵy.

Sondaı-aq, ol kórineý jalǵan aqparat taratqandar zańmen belgilengen jaýapkershilikter arqalap jatqanyn atady.