ІІM: Byltyr ekstremıstik sıpattaǵy 28 qylmystyq is qozǵaldy
ASTANA. 13 qańtar. QazAqparat - Byltyr elimizde ekstremıstik sıpattaǵy 28 qylmystyq is qozǵalyp, terrorıstk toptyń 24 qatysýshysy qamaýǵa alyndy. Bul týraly búgin Parlament Májilisinde ótip jatqan Úkimet saǵaty barysynda málim boldy.
Baıandama jasaǵan QR Іshki ister mınıstri Qalmuhanbet Qasymovtyń aıtýynsha, uıymdasqan qylmystyń qyzmetin, sonymen birge ekstremıstik jáne terrorıstik baǵyttaǵy qylmystardy anyqtaý jáne jolyn kesý baǵytynda jumystar belsendi júzege asyrylyp keledi. Máselen, uıymdasqan top qurý men oǵan basshylyq etý, bandıtızm faktileri boıynsha 53 qylmystyq is qozǵalǵan. Uıymdasqan krımınaldyq qurylymdardyń elýden astam jetekshileri men 230 qatysýshysy jaýapkershilikke tartylyp, olardan kóptegen qarý men esirtki tárkilengen. «Ekstremıstik sıpattaǵy qylmystar boıynsha 28 is qozǵaldy. Astana men Atyraý qalalarynda 3 terrorıstik top áreketiniń joly kesilip, olardyń 24 qatysýshysy qamaýǵa alyndy. Ekstremıstik sıpattaǵy aqparattan turatyn 11,4 myń birlik baspa ónimi, 1,2 myń birlik elektrondyq dasymaldaǵysh, 13 birlik kompıýterlik tehnıka tárkilendi», - deıdi mınıstr Q. Qasymov.
