ІІM: Bos kástróldi uryp, kórshilerin narazylyqqa shaqyrǵan azamat ustaldy
NUR-SULTAN. QazAqparat – Іshki ister mınıstrligi tótenshe jaǵdaı kezinde azamattardy tártipti saqtaýǵa shaqyrdy, dep habarlaıdy QazAqparat.
Mınıstrliktiń habarlaýynsha, TJ jarııalanǵan sátten bastap tártipti buzǵany úshin (ÁQB týraly QRK-niń 476-baby) jáne TJ jaǵdaıynda quqyq tártibin buzýǵa ıtermeleıtin is-áreketter úshin (478 ÁQB QRK-niń 478-baby) ákimshilik jaýapkershilikke 5 130 adam tartylǵan. Onyń ishinde 2479 adamǵa aıyppul salynyp, 1626 adam qamaýǵa alynǵan.
Məselen, ákimshilik qamaýǵa Almaty qalasynyń turǵyny Ashat Jeksebaev tartylǵan. Ol turǵyndardy úılerinen shyǵyp, bos kástróldermen urýǵa shaqyrǵan beıne úndeýin jazǵan.
«Sol sekildi Jambyl oblysynan Baǵdat Baqtybaev áleýmettik kómek alýǵa ótinim rásimdeýshi týraly túsirilim júrgizip, turǵyndardy tótenshe jaǵdaı kezinde quqyq tártibin buzýǵa ıtermeledi. Ol 10 táýlikke ákimshilik qamaýǵa alyndy. Tótenshe jaǵdaı kezinde quqyq tártibin buzýǵa ıtermeleıtin is-áreketteri úshin ákimshilik sot sheshimimen Jańaózen qalasynyń turǵyny Ashat Ótenov 20 táýlikke qamaýǵa alyndy. №4 Pavlodar qalalyq aýrýhanasynyń qyzmeti týraly əleýmettik jelilerde jalǵan aqparat taratqan, TJ kezinde medıtsınalyq mekemeniń qyzmetine aralasqan jáne buzǵan qala turǵyny Andreı Komandın ákimshilik 5 táýlikke qamaýǵa alyndy», - dep habarlaıdy mınıstrlikten.
Sondaı-aq ishki ister organdary koronavırýs týraly jalǵan aqparat taratý jaǵdaılaryn anyqtap jatyr. Búgingi kúni 80 is boıynsha sotqa deıingi tergeý júrgizilýde. Barlyq osyndaı fakt boıynsha kináliler anyqtalyp, qylmystyq jaýapkershilikke tartylady.
