ІІM basshysy Maqtaaraldaǵy tótenshe jaǵdaılardy joıý boıynsha jumysty jalǵastyrýdy tapsyrdy
MAQTAARAL. QazAqparat - ІІM basshysy qutqarýshylar men polıtseılerge tótenshe jaǵdaılardy joıý boıynsha jumysty jalǵastyrýdy tapsyrdy, dep habarlaıdy Polisia.kz.
Qazaqstan Respýblıkasynyń Іshki ister mınıstri Erlan Turǵymbaev memleket tarapynan qurylǵan komıssııamen birge Túrkistan oblysynyń Maqtaaral aýdanynda boldy. Mınıstr tótenshe jaǵdaıdy joıýǵa atsalysqan Ulttyq ulannyń, tótenshe jaǵdaılar qyzmeti men polıtsııanyń jeke quramyn, olardyń qural-jabdyqtaryn tekserdi.
Qazirgi tańda apattyq-qutqarý jumystaryna 1600-den astam polıtsııa, áskerı qyzmetshiler men qutqarýshylar qatysyp jatyr. 324 tehnıka jumyldyrylǵan. 17-si – qalqymaly qondyrǵy bolsa, 216 sý sorǵysh jabdyq bar.
6 mamyrda Ózbekstan Respýblıkasynan topan sýdy sorǵylaýǵa 200-den astam qutqarýshy men júzdiń ústinde sý sorǵylaýǵa arnalǵan arnaıy tehnıka jetkizildi. Qazirgi ýaqytta topan sý basqan aýdandarda 6 mıllıon tekshe metrden astam sý soryldy. Eldi mekenderde qoǵamdyq tártip pen azamattardyń qaýipsizdigin qamtamasyz etip, múlkin qorǵaý úshin polıtseıler táýlik boıy patrýldik qyzmette júr. Tótenshe jaǵdaıdyń alǵashqy kúnderinen bastap polıtseıler men áskerı kúshter laı men topan sý astynda qalǵan maldardy qutqarýmen aınalysty. 15 myńnan astam iri qara men úı qusy qaýipsiz aımaqqa shyǵaryldy. Tóńirekti topan sý basqanda 600-ge jýyq mal qyrylyp qaldy. Kóbi usaq mal boldy. Túrli ınfektsııanyń aldyn alý úshin veterınarııalyq qyzmetpen birge janýarlardyń óleksesin kómý jumystary tıisti sanıtarlyq normalarǵa sáıkes atqaryldy. Apattyq-qutqarý jumystary kezinde ıeleri tastap ketken kólikter de qaýipsiz aımaqqa shyǵaryldy. Polıtseıler men áskerı qyzmetkerlerge bolysqan eriktiler de kezek quryp, jergilikti turǵyndarǵa bar kómegin berip jatyr.
«Tótenshe jaǵdaı aımaǵynda qabyldanǵan sharalardyń arqasynda bir de bir qylmys bolǵan joq. Degenmen turǵyndar óz úıine oralyp, artynda qalǵan múlikterin alyp ketýge jaǵdaı jasaý úshin topan sýdyń saldaryn joıýǵa qatysty jumystardy jalǵastyra berý kerek», – dep málimdedi ІІM basshysy sapardy qorytyndylaǵan sózinde.
Eske salsaq, 1 mamyr kúni kórshi memlekettiń Sardoba sý qoımasynda bolǵan apattyń saldarynan Maqtaaral aýdanynyń bes eldi mekenin topan sý basqan edi. Birinshi kúni 5400 jergilikti turǵyn qaýipsiz aımaqqa shyǵaryldy. Barlyǵy – 31 myńnan astam turǵyn evakýatsııalandy.
Jalpy aıtqanda, Jeńis, Jańaturmys, Órgebas, Fırdaýsı jáne Dostyq aýyldarynda 1030 úıdi sý basty. Qazir sý basqan eldi mekenderdiń turǵyndary týystary men 12 evakýatsııalyq pýnktke ornalastyryldy.
