ІІM basshysy Qostanaı oblysy saqshylarynyń jumysyn tekserdi

KOSTANAI. QazAqparat - Іshki ister mınıstri Erlan Turǵymbaev Qostanaı oblysyna kelip, polıtsııa qyzmetin jetildirýdiń negizgi qaǵıdattaryn júzege asyrý boıynsha elimizdiń Prezıdenti bergen tapsyrmalaryn oryndaý barysymen tanysty. Birinshiden bul halyqpen jumys jasaýda servıstik modeldi, «Polıtsııa qadamdyq qoljetimdilikte» prıntsıpin jáne «Halyq únine qulaq asatyn memleket» tujyrymdamasyn engizý, dep habarlaıdy QazAqparat.

Mınıstr jeke qurammen kezdesý barysynda Polıtsııa departamentiniń bıylǵy jumysyndaǵy basym baǵyttaryn aıqyndady.

Erlan Turǵymbaev óńirdegi qylmystyń ahýaly turaqty qalypta ekenin jáne quqyq buzýshylyqtyń aldyn alýda saqshylardyń jumysy óte mańyzdy ekenin atap ótti.

– Jergilikti polıtsııa qyzmetin jetildirýdegi bizdiń basty mindetimiz azamattardyń qaýipsizdigi. Sondyqtan, ulttyq servıstik modeliniń negizgi tulǵasy – ýchaskelik polıtsııa ınspektorynyń tıimdi qyzmet atqarýy úshin biz barlyq jaǵdaılardy jasaýdy jalǵastyratyn bolamyz, – deıdi ІІM basshysy.

Mınıstr qala ortalyǵyndaǵy jıyrma tórt myńnan astam halyqqa qyzmet kórsetetin «Naberejnyı» tirek beketine at basyn burdy. Erlan Turǵymbaev quqyq buzýshylyqtyń aldyn alýda jergilikti sherıfterdiń jumysy óte mańyzdy ekenin atap ótti.

Qalanyń ortalyq aýmaǵyna alty ýchaskelik polıtsııa ınspektory qyzmet kórsetedi. Atalmysh aýmaqta 24 myńnan astam adam turady. Halyqpen tyǵyz baılanys qurýda sheshýshi sharttardyń biri – qyzmettegi turaqtylyq, ýchaskelik polıtsııa ınspektory 11 jyldan astam ýaqyt bir orynda tapjylmastan jumys istep kele jatyr. Ýchaskelik polıtsııa aǵa ınspektory Erik Vaısov quqyq tártibin qamtamasyz etýde ózine polıtsııanyń eki erikti kómekshisi jáne úsh volonter kómek kórsetetinin baıandady.

Sondaı-aq, Erlan Turǵymbaev polıtsııa bólimderiniń tehnıkalyq turǵyda nyǵaıtylý jaǵdaıyn jáne Jedel basqarý ortalyǵynyń jumysyn tekserdi. Ol 211 beınebaqylaý kamerasyn, sonyń ishinde «Qaýipsiz aýla» jobasy aıasynda turǵyn úı aýlalarynda ornatylǵan 60 beınekamerany qamtıdy.

Kameralardyń kómegimen jyl basynan 60 qylmys ashyldy jáne 10 myńnan astam ákimshilik quqyq buzýshylyq anyqtaldy. Beıne kameralar sanyn ulǵaıtý nátıjesinde oblys ortalyǵynda kóshe qylmystaryn 40 paıyzǵa derlik tómendetýge qol jetkizildi.

Sonymen qatar, ІІM basshysy Qostanaı oblysynda bes jyl qatarynan polıtsııanyń jańa úlgidegi turaqty bes beketi ashylatynyn habarlady. Qalanyń jańa shaǵynaýdandarynda tek bıyldyń ózinde jańadan úsh ýchaskelik polıtsııa tiregi ashylady. Sonyń biri, jańa tehnıkamen jabdyqtalǵan ıÝbıleınyı shaǵynaýdanynda óz qyzmetine kiristi.

Memleket basshysy Ulttyq qoǵamdyq senim keńesiniń otyrysynda áıelderdi zorlyq-zombylyqtan qorǵaý jónindegi ınspektorlardyń shtattyq sanyn ulǵaıtýǵa basty nazar aýdarǵan bolatyn. Búginderi Qostanaı oblysynyń árbir polıtsııa bóliminde osy baǵytta jumys isteıtin 19 ınspektor taǵaıyndaldy.

Mınıstr jol qaýipsizdigin qamtamasyz etý jáne jergilikti polıtsııa qyzmetin jetildirý, sonymen qatar ýchaskelik polıtsııa ınspektorlary dárejesin arttyrý basym baǵyttar dep belgiledi.