ІІM Astanadaǵy zańsyz sherý týraly: Olar Aqordaǵa bettemek boldy

ASTANA. QazAqparat – QR Іshki ister mınıstriniń orynbasary Igor Lepeha 26 qarasha kúni Astanada ruqsat etilmegen sherýge shyqqandar týraly málimet berdi, dep habarlaıdy QazAqparat tilshisi.

«Zańsyz sherý boldy. Polıtsııa qyzmetkerleri onyń jolyn kesti», - dedi ol Májilis kýlýarynda.

Aıtýynsha, sherý kezinde 18 adam ustalyp, ákimshilik jaýapqa tartylǵan.

«Ol sharada 300-deı adam boldy. 1,5 saǵattan keıin Aqordaǵa qaraı betteý týraly úndeý tastaldy. Olar kóshege shyqty jáne olardyń áreketterinde mıtınginiń belgileri bar. Óıtkeni, daýys zoraıtqyshtar boldy, úndeýler aıtyldy. Aqordaǵa qaraı bettedi. Sondyqtan, biz olardyń jolyn kesip, toqtatýǵa májbúr boldyq. Uıymdastyrýshy ustalyp, 15 táýliktik ákimshilik jaýapqa tartyldy. Biz olardyń qandaı talap qoıatynyn kútip tura almadyq. Óıtkeni, zańsyz sherýdiń ózi – ákimshilik quqyq buzýshylyq», - dedi Igor Lepeha.

Buǵan deıin elorda polıtsııasy qalada bolǵan mıtıngige qatysty jaǵdaıdy túsindirgen edi.

Sondaı-aq, polıtsııa M. Ábıevke qatysty ákimshilik quqyq buzýshylyq týraly eki hattama toltyrǵany habarlandy.