ІІM aqtóbelik 9 polıtseıdiń jumystan zańdy túrde qýylǵandyǵyn aıtýda
ASTANA. QazAqparat - QR Іshki ister mınıstrligi Memlekettik til jáne aqparat departamentiniń dırektory Almas Sadýbaev Aqtóbe qalasy Elek polıtsııa bólimshesiniń jumystan qýylǵan 9 qyzmetkeriniń daýyna qatysty túsinikteme berdi, dep habarlaıdy QazAqparat.
«2016 jyldyń sáýir aıynda Aqtóbe qalalyq ІІD Elek polıtsııa bólimshesine qylmystyq ister boıynsha tergeý merzimderin negizsiz toqtatý faktisi boıynsha qyzmettik tekserý júrgizildi. Onyń barysynda atalǵan faktiler rastaldy. Kúdiktiler bola tura eshbir sebepsiz sotqa deıingi tergeý merzimi toqtatylǵan 71 qylmystyq is anyqtaldy. Munan bólek, Qylmystyq is júrgizý zańy, Bas prokýrordyń qylmystyq quqyq buzýshylyq týraly aryzdardy, habarlamalardy nemese baıanatty qabyldaý jáne tirkeý erejesin bekitý buıryǵy, sonymen qatar Sotqa deıingi tergeýdiń biryńǵaı tizilimin júrgizý talaptaryn óreskel buzýshylyqtar oryn alǵan», - dedi Almas Sadýbaev.
Onyń aıtýynsha, qyzmettik tergeý nátıjesine baılanysty jedel keńes ótkizilip, onda polıtsııa bólimshesiniń 9 qyzmetkerine qatysty tártiptik sıpattaǵy shara qabyldanǵan. Polıtsııa bóliminiń bastyǵy, onyń jedel jáne tergeý jumystary boıynsha orynbasarlary, tergeýshiler ishki ister organdarynan shyǵarylǵan.
«Ótken jyly jumystan shyǵarylǵan qyzmetkerler sotqa buıryqty joıý jáne burynǵy laýazymdaryn qaıta qalpyna keltirý týraly talap aryzben júgindi. Sot polıtsııa bólimi bastyǵynyń jedel jumystar jónindegi burynǵy orynbasarynyń tergeý men anyqtaýdy baqylaýǵa quqyǵy bolmaǵan degen paıymǵa kelip, al qalǵandarynyń talap aryzdaryn qanaǵattandyrýdan bas tartty»,- dedi departament basshysy.
Aıta keteıik, buǵan deıin Aqtóbe qalasyndaǵy Elek polıtsııa bóliminiń bastyǵy, orynbasarlary, tergeý bólimi bastyǵynyń orynbasary, birneshe tergeýshi ózderiniń zańsyz jumystan shyǵarylǵandyǵyn aıtyp , Bas prokýratýradan arasha suraǵandyǵyn habarlaǵan bolatynbyz.
