ІІM: 70 myńnan astam polıtsııa qyzmetkerleri attestatsııadan ótedi
ASTANA. 11 sáýir. QazAqparat - Іshki ister organdarynyń 70 myńnan astam qyzmetkerleri attestatsııadan ótedi. Bul týraly búgin Astanada ótken brıfıngte QR ІІM Kadr jumysy departamenti bastyǵynyń orynbasary Bolat Іshkibaev málim etti.
Esterińizge sala keteıik, Memleket basshysy 2012 jyly 8 sáýirde «Qazaqstan Respýblıkasy quqyq qorǵaý organdarynyń qyzmetkerlerin kezekten tys attestattaýdy ótkizý týraly» Jarlyqqa qol qoıdy.
Іshki ister organdarynyń qyzmetkerlerin kezekten tys attestattaýdy ótkizý kezinde attestattaýdan ótýshiniń qyzmettik jumysyna, olarmen sybaılas jemqorlyqqa qarsy zańnamany saqtaýyna baǵa beriletin bolady.
«Jalpy respýblıka boıynsha kezekten tys attestattaýdan ótýge 70 myńnan astam polıtsııa qyzmetkerleri qamtylmaq. Qazirgi ýaqytta mınıstrlikpen kezekten tys attestattaýdy ótkizýge daıyndyq is-sharalary júrgizilip jatyr», - dedi B. Іshkibaev.
«Qazaqstan Respýblıkasy ishki ister organdarynyń qyzmetkerlerin kezekten tys attestattaýdy ótkizýdi uıymdastyrý týraly» Іshki ister mınıstri buıryǵynyń jobasy ázirlendi. «Onda kezekten tys attestattaýdy ótkizý jónindegi ádistemelik usynymdardy, komıssııalardyń quramdaryn, ótkizý kestesin, Qazaqstan Respýblıkasynyń zańnamalaryn bilýge kompıýterlik testileý úshin suraqtar tizbesin, jaýyngerlik, qyzmettik jáne dene shynyqtyrý daıarlyqtary boıynsha normatıvter tizbesin bekitý kózdelgen», - dep toqtaldy departament bastyǵynyń orynbasary.
Bul rette ishki ister organdarynyń barlyq aýmaqtyq bólimshelerine daıyndyq is-sharalaryn ótkizý, ıaǵnı testileý ótkizý úshin kompıýterlik quraldardy daıyndaý, jeke kabınetter bólý týraly, sondaı-aq jaýyngerlik, qyzmettik jáne dene shynyqtyrý daıarlyqtary boıynsha synaqtar qabyldaý úshin jaǵdaılar jasaý týraly tıisti nusqaý jiberildi.
