III Túrki ýnıversıadasynda qazaqstandyq dzıýdoshylar úsh medal aldy

ASTANA. KAZINFORM – Qyrǵyz Respýblıkasynda ótip jatqan III Túrki ýnıversıadasynda Qazaqstan stýdentteri alǵashqy kúnnen-aq jarqyn jeńisterge qol jetkizdi. Dzıýdo jarystarynda búgin, 5 qyrkúıek kúni, ulttyq quramanyń úsh birdeı ókili júldeli orynǵa ıe boldy.

Baıshev ýnıversıtetiniń stýdenti Gúlnur Bahanova Qazaqstan quramasynyń qorjynyna ekinshi altyn medaldi saldy. Almaty gýmanıtarlyq-ekonomıkalyq ýnıversıtetiniń stýdenti Іńkár Týlepbergenova kúmis medal ıegeri atandy. Sondaı-aq Qazaq sport jáne týrızm akademııasynyń stýdenti Nurshat Kemelhanqyzy qola júldeni jeńip aldy.

– Jalpy esepte Qazaqstan stýdentteri 2 altyn, 1 kúmis jáne 1 qola medal enshiledi. Bul jetistik – jas sportshylarymyzdyń eńbegi men jigeriniń nátıjesi ǵana emes, sonymen qatar elimizdegi stýdenttik sporttyń qarqyndy damýynyń aıqyn dáleli, - delingen Ǵylym jáne joǵary bilim mınıstrliginiń habarlamasynda. 

Eske sala keteıik, buǵan deıin qazaqstandyq stýdent ІІІ Túrki ýnıversıadasynda alǵashqy altyndy jeńip alǵanyn jazǵan edik.