III halyqaralyq «Dala daýysy» radıofestıvali Astana tórinde ótedi
ASTANA. QazAqparat - 28-qarasha kúni Elorda tórinde III halyqaralyq «Dala daýysy» radıofestıvali ótedi. Qazaq radıosynyń bastamasymen úshinshi ret ótkizilip otyrǵan qazaqtyń dástúrli jáne zamanaýı ánderin asqaqtatatyn bul án baıqaýynda «Dástúrli án», «Akademııalyq oryndaýshy», «Estrada», «Etno estrada», «Jańa esimder» atalymdary boıynsha baq synap, jeńimpaz atanǵan oryndaýshylar saltanatty túrde marapattalady, dep habarlady daladauysy.kaztrk.kz.
«Kezinde ásem daýysymen qazaqtyń dástúrli ánin shyrqap, ony álemge moıyndatqan Ámire Qashaýbaev, Qalı Baıjanov, Manarbek Erjanov, Kúlásh Baıseıitova, Júsipbek Elebekov, Dánesh Raqyshev, Jamal Omarova syndy kúmis kómeı ánshileriniń salyp ketýken sara jolyn úzbeı, qazaqtyń án óneriniń áleýetin asqaqtatý maqsatynda 2012 jyly Qazaq radıosynyń bastamasymen «Dala daýysy» jobasy ashyldy. Bul - qazaq mýzykasy arqyly ana tilimizdi álem halyqtarynyń arasynda barynsha nasıhattaıtyn elimizdegi birinshi ári, jalǵyz radıofestıval. Basty talap - festıvalǵa qatysýshylardyń, tipti ol shet eldik úmitkerler bolsa da, qazaq ánin naqyshyna keltirip oryndaý. Sol sebepti de osy az ǵana ýaqyt ishinde bul joba radıofestıval sheńberinen asyp, bedeldi mýzykalyq sherýge aınalyp otyr», delingen habarlamada.
Kásibı oryndaýshylar arasynda atalǵan sharanyń jyldan-jylǵa bedeli ósip, shet eldik oryndaýshylardyń qyzyǵýshylyǵyn arttyrýda. Ótken jyly «Dala daýysy» rodıofestıvaline qatysýǵa otandyq ánshilermen qosa, Reseı, Túrkııa, Qytaı, Manǵolııa jáne Qyrǵyzstannan da úmitkerler nıet bildirgen bolatyn. Al bıylǵy jyly ótinish Qytaı, Reseı, Ýkraına, Belorýsııa, Tatarstan, Qyrǵyzstan, latvııalyq oryndaýshylardan da kelip tústi. «Dala daýysynyń» irikteý týrynan ótken árbir shyǵarma mıllıondaǵan tyńdarmanǵa Qazaq radıosynyń efıri men ǵalamtor arqyly tarady. Osylaısha halyqtyń kóńilinen shyǵyp, 100 paıyz daýys jınaǵan úzdik oryndaýshy baıqaý fınalyna joldama aldy. Al, aqtyq saıysta «Dala daýysy» syılyǵynyń ıegerleri 40 paıyz tyńdarmannyń daýys berýimen, 40 paıyz mamandardyń saraptaýymen, 20 paıyz joba uıymdastyrýshylarynyń usynysy boıynsha anyqtalady. Olardyń esimderi III halyqaralyq «Dala daýysy» radıofestıvaliniń gala-kontsertinde jarııalanyp, saltanatty túrde arnaıy dıplom jáne «Dala daýysynyń» eksklıýzıvti statýetkasymen marapattalady.
