III Dúnıejúzilik kóshpendiler oıyndary: Armrestlıngten QR quramasy kóshbasshylar qatarynda
ShOLPAN-ATA. QazAqparat - 3 qyrkúıekte III Dúnıejúzilik kóshpendiler oıyndary aıasynda Sholpan-Ata qalasy dene shynyqtyrý-saýyqtyrý kesheni aýmaǵynda (DSK) erler men áıelder arasynda túrli salmaq dárejesi boıynsha armrestlıngten jarys ótti, dep habarlaıdy QazAqparat tilshisi.
Qazaqstan komandasynyń quramynda 6 sportshy qatysty. Áıelder arasynda quramadan Pısmennaıa Oksana (75 kg) men Lısıanskaıa Antonına (+75 kg) qatysyp jatyr. Erlerden Faradjov Valı (75 kg), Stıpanchýk Andreı (95), Sazonov Oleg (105) pen Dmıtrıı Trýbın (+105kg) el namysyn qorǵaýda.
Jarystyń nátıjesi boıynsha Qazaqstan quramasy 7 altyn jáne 5 kúmis medal ıelenip, jalpy komandalyq esepte kóshbasshylar arasyna kirdi.
Aıta keteıik, jarys eki qolmen ótti. Qazaqstanmen birge is-sharaǵa Ýkraına, Bolgarııa, Iran, AQSh, Koreıa, Úndistan, Ázerbaıjan, Ózbekstan jáne Qyrǵyzstan ókilderi qatysýda.
III Dúnıejúzilik kóshpendiler oıyndary 2-8 qyrkúıek aralyǵynda Ystyqkól (Qyrǵyzstan) aýmaǵynda ótip jatyr. Qazaqstan quramasynan 25 etnosport túrinen 134 sportshy kúsh synaýda.
