III Baikonyr SFF baıqaýyna qatysatyn fılmder anyqtaldy
ALMATY. QazAqparat - Almatyda ótetin III Baikonyr Short Film Festival qysqametrajdy fılmder baıqaýynyń baǵdarlamasyna qatysatyndar anyqtaldy, dep habarlaıdy QazAqparat tilshisi.
Baıqaý irikteýinen 195 fılmniń 47-si ótken. Onyń ishinde derekti, oıyn túrindegi fılmder men anımatsııalyq jumystar bar. Saıyskerler kınotanýshy Erjan Jumabekov pen kınosynshy Kárim Qadyrbaevtyń irikteýinen ótti.
III Baikonyr SFF qatysatyn týyndylar 3 sanatqa bólingen. Oıyn túrindegi fılm sektsııasyna 27 kartına usynylsa, anımatsııalyq fılmder - 11 , derekti fılmder sany - 9. Festıvalǵa negizinen kópshilikke áli tanylyp úlgermegen jas rejısserlerdiń jumystary qatystyrylýda. Esesine, qazylar alqasynyń quramy aıtarlyqtaı aýqymdy.
Akter, rejısser ári prodıýser Nurtas Adambaı, aktrısa jáne prodıýser Baıan Alagózova, Ózbekstannyń Jas kınematografshylary keńesiniń tóraǵasy Oıbek Abdýshýkýrov, aktrısa Arýjan Jazylbekova jáne kıno salasyndaǵy ózge de tulǵalar fılmderdiń baǵasyn bermek.
Komıssııa tóraıymy kınotanýshy ári synshy Qyrǵyzstan Kınematografshylary odaǵynyń múshesi Gýlbara Tolomýshova.
Bıyl jeńimpazdar 13 atalym boıynsha marapattalady. Atap aıtqanda, gran-prı, «Úzdik rejısser», «Úzdik taspager», «Úzdik qoıýshy-sýretshi», «Úzdik stsenarıı», «Úzdik eskperımenttik fılm», «Úzdik derekti fılm», «Úzdik anımatsııalyq fılm», «Úzdik akter», «Úzdik aktrısa», «Úzdik dybys», «Brodveı» tańdaýy», «Qazylardyń arnaıy syılyǵy».
Baıqaý shymyldyǵy Jannat Alshanovtyń «Mezgil sońy» fılmimen ashylady. Bul fılm 71-shi Kann kınofestıvaliniń qysqametrajdy fılmder baıqaýyna qatysqan bolatyn.
