IIDMB: Bıyl 1 trln teńgeniń 150 jańa jobasy iske qosylady

ASTANA. QazAqparat - Ústimizdegi jyly Indýstrııaldy-ınnovatsııalyq damý memlekettik baǵdarlamasy aıasynda 1 trln teńgege 150 jańa joba iske qosylady. Bul týraly búgin Úkimettiń selektorlyq rejimdegi otyrysynda atalǵan baǵdarlamanyń ótken jylǵy qorytyndysyn shyǵarǵan QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat.

«Indýstrııaldy-ınnovatsııalyq damý memlekettik baǵdarlamasy úshinshi jyl iske asyrylýda. Baǵdarlamanyń negizgi baǵyty - óńdeý ónerkásibi. Búgingi tańda biz baǵdarlamanyń iske asyrylý nátıjelerin 2015 jylmen salystyra qorytyndylaımyz. Baǵdarlamanyń tabysty iske asyrylýy óńdeý ónerkásibiniń 2015 jylmen salystyrǵanda 2017 jyldyń qorytyndysy boıynsha 5,7 paıyzǵa ósýine yqpal etti», - dedi mınıstr.

Onyń dereginshe, ósim negizinen metallýrgııa, tamaq ónerkásibi, munaı óńdeý, hımııa ónerkásibi jáne farmatsevtıka salalaryndaǵy óndiristiń artýy esebinen qamtamasyz etilgen.

«Memlekettik baǵdarlamanyń negizgi nysanaly ındıkatorlary boıynsha oń serpin baıqalady. Óńdeý ónerkásibiniń eksporty 2015 jylmen salystyrǵanda 2017 jyldyń qorytyndysy boıynsha 10,5 paıyzǵa ósip, 15,5 mlrd AQSh dollaryn qurady. 2017 jylǵy 9 aıdyń qorytyndysy boıynsha eńbek ónimdiligi 1,9 paıyzǵa ósti jáne bir adamǵa shaqqanda 22,3 myń AQSh dollary boldy. Bul rette, eńbek ónimdiligine qatysty jyldyq derekter 2018 jyldyń shilde aıynda belgili bolady», - dedi ol.

Jeńis Qasymbektiń málimetterine sáıkes, 2017 jyly óńdeý ónerkásibindegi ınvestıtsııalar kólemi 2015 jylmen salystyrǵanda 8,8 paıyzǵa ósip, 982 mlrd teńgeni quraǵan.

«Memlekettik baǵdarlama aıasynda jyl saıyn jańa óndiristerdi iske qosamyz. 3 jylda Indýstrııalandyrý kartasy aıasynda 3 trln teńge qarjyǵa 378 joba iske qosylyp, 30 myńnan astam turaqty jumys orny ashyldy. Jalpy, 2017 jyly 1,5 trln teńge qarjyǵa 120 joba iske qosylyp, 10 myń turaqty jumys orny quryldy. 2018 jyldyń sońyna deıin 1 trln teńge qarjyǵa 150 jańa jobany iske qosý josparlanyp otyr», - dedi Jeńis Qasymbek.